Մելիք Մանուկյանի կամ ինչպես նրան կոչում են հասարակության շրջանակներում, «Շշի Մելոյի» դեմ մահափորձը պատվիրված է եղել. գործարարը ցուցմունք է տվել
ԱԺ նախկին պատգամավոր, գործարար Մելիք Մանուկյանը ցուցմունք է տվել իր դեմ ներկայացված մահափորձի գործով։ Այս մասին News.am լրատվականին է հայտնել Մանուկյանի պաշտպան Հրանտ Գևորգյանը։
Փաստաբանը հայտնել է, որ Մելիք Մանուկյանը հարցաքննության ընթացքում պնդել է, որ չի ճանաչում և երբևէ առնչություն չի ունեցել գործով կալանավորված անձանց հետ։
Փաստաբանի կարծիքով՝ հանցագործությունը պատվիրված է եղել, սակայն տեղյակ չէ, թե նախաքննական մարմինն ինչ քայլեր է ձեռնարկում պատվիրատուներին բացահայտելու ուղղությամբ ։
Անդրադառնալով Երևան-Սևան մայրուղում տեղի ունեցած պայթյունի դեպքի վայրի եռաչափ մոդելավորմանը, պաշտպանը նշեց, որ տեսանյութում սխալ է ներկայացված պայթյունի պահը։
«Պայթյունն առաջացել է, երբ Մելիք Մանուկյանին պատկանող «Ռենջ Ռովեր» մակնիշի մեքենայի աջ անիվը հպվել է ճանապարհին։ Ոչ թե մեքենան անցել է, նոր է պայթյունը եղել, այլ, երբ մեքենան հավասարվել է պայթյունի վայրին։ Պայթյունի պահին նրան ուղեկցող «Նիսսան Պատրուլ» մակնիշի մեքենան ոչ թե «Ռենջ Ռովեր»–ի հետևից է ընթացել, այլ նկատելով պայթյունը՝ թեքվել է ձախ, մինչդեռ եռաչափ պատկերում տպավորություն է, թե պայթյունն ուղղված է եղել «Նիսսան Պատրուլ»–ին»,–ասաց պաշտպանը։
Փաստաբանը հայտնեց, որ պայթյունի դեպքը ֆիքսել է ապակե տարաների արտադրությամբ զբաղվող «Սարանիստ» ՍՊԸ-ի տեսախցիկը, որի տեսագրությունը նա ներկայացրել է վարույթն իրականացնող մարմնին։ Պաշտպանը միևնույն ժամանակ միջնորդել է նախաքննական մարմնին՝ վերացնել դեպքի վայրի եռաչափ մոդելավորման անճշտությունները։
Ավելի վաղ տեղեկացրել էինք, որ Երևան-Սևան մայրուղու 15-րդ կմ հատվածում գտնվող կամրջի տակ նախապես տեղադրվել էր ռազմամթերք հանդիսացող պայթուցիկ նյութ, որը 2019թ. օգոստոսի 02-ին` ժամը 12:30-ի սահմաններում, պայթեցվել էր՝ Մ.Մանուկյանի «Ռենջ Ռովեր» մակնիշի ու նրան ուղեկցող «Նիսսան» և «Պատրուլ» տեսակի ավտոմեքենաների ընթացքի ժամանակ:
Պարզվել էր, որ Երևան-Սևան ճանապարհին՝ կամրջի տակ տեղադրված պայթուցիկը հեռակառավարվել է:
Ձեռք բերված բավարար ապացույցների համակցությամբ՝ երեք անձանց՝ ծնված 1974թ., 1963 և 1966թթ.., մեղադրանք է առաջադրվել՝ ՀՀ քրեական օրենսգրքի 34-104-րդ հոդվածի 2-րդ մասի 6-րդ և 7-րդ կետերով և 235-րդ հոդվածի 2-րդ մասով: Քննիչը միջնորդություն է ներկայացրել դատարան՝ նրանց նկատմամբ որպես խափանման միջոց կալանավորում ընտրելու վերաբերյալ, ինչը բավարարվել է:
Operativ լրատվականը ցուցադրել էր նաև «Շշի Մելոյի» մեքենայի պայթյունի և դեպքի վայրի 3D մոդելավորումը :