Շատ կուզեի, որ իմ մինուճար որդին այսօր իմ կողքին լիներ, բայց դա իր որոշումն էր. մայրը՝ Ապրիլյանում զոհված Սաշա Գալստյանի մասին (տեսանյութ)

Ապրիլյան պատերազմում զոհված սերժանտ Սաշա Գալստյանի մայրը որոշել է՝ այսուհետև իր մինուճար որդու ծննդյան տարեդարձերին ուրախ է լինելու։ Դա հարգանքի տուրք է՝ որդու հավերժանալու որոշմանը։

«Շատ կուզեի, որ իմ մինուճար որդին այսօր իմ կողքին լիներ, բայց դա իր որոշումն էր»,– այսօր՝ օգոստոսի 12–ին, որդու ծննդյան 23–րդ տարեդարձի օրը, պատմեց տիկին Սոֆին։

«2 տարի Սաշայիս ծնունդներն անցկացրել եմ ողբով: Այս տարի մոտ մեկ շաբաթ առաջ վերադարձել եմ Արցախից։ Այնտեղից ես վերադարձել եմ այնպես հպարտ, ու ես խոսք եմ տալիս Սաշին, որ աշխատելու եմ սրանից հետո իր ծնունդները դիմավորել շատ ուրախ, որովհետեւ ինքը կա: Երբ չզգամ նրա ներկայությունը, չեմ ապրի, բայց Սաշան կա ինձ համար՝ դեռ բանակում է։ Սաշան մեզ հետ ունեցել է 19 ծնունդներ, որոնք մեկը մյուսից տարբերվել են։ Սաշան եղել է շատ ընկերասեր եւ չի եղել այնպիսի մի դեպք, որ ինքն իր ծննդյան օրը չտոնի։ Շատ էր սիրում իր ծննդյան օրը եւ պարտադիր շատ հյուրեր էինք ունենում։ Արցախ աշխարհում տեսա՝ մեր տղաները թեւածում էին այնտեղ: Երբ Արցախում քայլում էինք փողոցով, քահանաներն ասում էին՝ հերոսներիս ծնողները, այսինքն՝ նրանք մեր տղաներով մեզ ճանաչում են: Դա արդեն մեզ պարտավորեցնում է՝ մենք պետք է մեզ հպարտ պահենք»,– պատմեց նա։

Որդու զինակիցները երբեմն այցելում են Սաշայի ծնողներին, պատմում նրանց որդու մասին պատմություններ, որոնք ընտանիքում չեն լսել. «Երբ զանգահարում էի, ասում էի՝ Սաշ, ի՞նչ ուղարկեմ քեզ համար, պատասխանում էր, թե՝ մամ ջան, ես սանատորիայում չեմ, ես ոչնչի կարիք չունեմ, այստեղ ամեն ինչ շատ լավ է, միայն եթե կարող ես՝ բալի ու մալինայի մուրաբա փակի, դա վերեւների համար է: Հետո իր ծառայակից ընկերները պատմում էին, որ երեկոյան, երբ տղաները հերթափոխի են կանգնած եղել, բրդուճներ էր պատրաստում ու մալինայի եւ բալի մուրաբաներով թեյ էր բերում, զենքը ձեռքներից վերցնում էր, ասում էր՝ դուք գնացեք մի փոքր հանգստացեք, տաքացեք, թեյ խմեք, ես ձեր փոխարեն կկանգնեմ: Դա խոսում է իմ տղայի մարդ տեսակի մասին»։

Սաշան մեծ ցանկություն ուներ բժիշկ դառնալ։ Մայրը հիշեց, որ դեռ 4-րդ դասարանից որոշել էր հստակ՝ բժիշկ է դառնալու, մեկնեց ծառայության ու բանակում անցկացրած շրջանն իրեն կողմնորոշեց դառնալ վիրաբույժ.

«4-րդ դասարանում շարադրություն գրեց, որ ամեն անգամ, երբ տեսնում է բժիշկներին՝ ճերմակ խալաթը հագած, իր մեջ ցանկություն է առաջանում բարություն անել եւ բժշկել մարդկանց: Երբ 4-րդ դասարանում գրեց այդ շարադրությունը, արդեն 9-րդ դասարանում ուսուցչուհին նրանց բաժանեց շարադրությունները, Սաշայիս մակագրեց՝ հաջողություններ ապագա բժշկին, ու Սաշան ընտրեց իր ուղին: Նա հպարտորեն կրում էր ճերմակ խալաթը: Բանակում որոշել էր, որ պետք է վերադառնա եւ վիրաբույժ դառնա»,– պատմեց մայրը։ Սաշան ընդունվել էր Երեւանի Հայբուսակ համալսարան։ Ուսման առաջին կիսամյակի ավարտին՝ 2015թ․ հունվարի 14-ին, զորակոչվել էր բանակ։

Նշենք, որ Մեծամորում այսօր`օգոստոսի 12-ին, բացվել է Ապրիլյան պատերազմում զոհված Սաշա Գալստյանի եւ մյուս զինծառայողների հուշարձանը:

Միջոցառմանը ներկա են եղել զոհված զինծառայողների հարազատները, Պաշտպանության փոխնախարար Դավիթ Բալայանը, վարչապետի տիկին Աննա Հակոբյանը։ Հուշարձանը բացեց Արմավիրի մարզպետ Համբարձում Մաթեւոսյանը:

Հիշեցնենք, որ 2016 թվականի ապրիլի 1-ի լույս 2-ի գիշերը ադրբեջանական կողմը լայնամասշտաբ հարձակում էր գործել Արցախի ուղղությամբ։ Սաշա Գալստյանը 2016 թվականի ապրիլի 1-ին բարձրացել էր դիրքեր եւ նույն օրվա գիշերը ժամը 04:30-ի սահմաններում տեղի էր ունեցել հարձակումը։ Արցախյան պատերազմի ժամանակ զոհված Ադամ Սահակյանը կապ հաստատելով Սաշա Գալստյանի հրամանատարի հետ, զեկուցել էր, որ հակառակորդը բավականաչափ մոտեցել է եւ այդ ժամանակ հրամանատարն անցել է Ադամի դիրք։ Մարտական գործողությունների ողջ պատասխանատվությունը իր վրա վերցնելով՝ 4 հոգուց բաղկացած սահմանապահ ուժերը դիրքի ավագ Սաշա Գալստյանի գլխավորությամբ՝ անցնում են հարձակման։ Սաշան 4-5 ժամ թեժ պայքար մղելով թշնամու դեմ, մեծ կորուստներ է հասցնում եւ զոհվում հակառակորդի դիպուկահարի գնդակից։