Քոչարյանի աջակիցները պահանջում են, որ ԲԴԽ–ն արձագանքի Փաշինյանի արտահայտություններին (Տեսանյութ)
ՀՀ երկրորդ նախագահ Ռոբերտ Քոչարյանի աջակիցներն այսօր` օգոստոսի 12-ին, ԲԴԽ շենքի առջև իրենց բողոքի ակցիան ավարտելուց առաջ իրենց պահանջները բարձրախոսով ներկայացրեցին ԲԴԽ-ին:
Աջակիցներից փաստաբան Վահե Եփրիկյանը հայտարարեց, որ իրենց պահանջները վաղը գրավոր կներկայացնեն ԲԴԽ-ին, եւ ակնակալում են գրավոր պատասխան:
«ԲԴԽ հարգելի անդամներ, քանի որ ձեր մամուլի ծառայության պատասխանատուի կողմից նոր ծանուցվեցինք, որ դուք պատրաստ եք ծանոթանալ մեր պահանջներին, բայց գրավոր տարբերակով եւ այժմ ընթանում է դռնփակ նիստ եւ ենթադրում ենք` դուք ցանկանում եք սույն նիստի ընթացքում օեպրատիվ կերպով քննարկել մեր կողմից բարձրաձայնված հարցերը, ուստի հիմա այն հարցերը բանավոր եղանակով կներկայացնենք ձեզ, իսկ վաղն առավոտյան գրավոր տարբերակը կներկայացնենք՝ ակնկալելով գրավոր փաստարկված եւ հիմնավոր պատասխան, որպեսզի մեր հանրությունն իմանա, թե ինչպես եք վերաբերվում այն հարցերին, որոնք մենք ձեր առջեւ բարձրացրել ենք, բարձրացնում ենք եւ հետեւողականորեն բարձրացնելու ենք: Առաջին եւ կարեւորագույն խնդիրն այն է, թե ինչպիսի միջոցներ են ձեռնարկվում նախագահ Քոչարյանի եւ մյուսների վերաբերյալ քրեական գործով ներկա պահին դատարանի չկազմավորվելու հետ կապված, ձեր կողմից նորաթուխ նշանակված ԲԴԽ անդամների վերաբերմունքը: Ընդհանուր իրավասության դատարանի նախագահ Արթուր Մկրտչյանն ինչո՞ւ չի կարողանում գործի դնել համակարգիչը, որը պետք է ընտրի դատավորին, ով էլ պետք է քննի նախագահ Քոչարյանի կալանքի եւ առհասարակ գործը: ԲԴԽ հարգելի անդամներ, հաշվի առնելով՝ նախագահ Քոչարյանի գործի վերաբերյալ ստեղծված կոլապսային իրավիճակը՝ կապված գործի հանրային հնչեղության եւ մասշտաբների մեծության հետ, ինձ թվում է` բոլորին հետաքրքիր է` գործն ինչ փուլում է, ինչու չի իրականացվում դատավարություն եւ ինչու է արհեստականորեն ձգձգվում, ինչպիսին է ձեր վերաբերմունքը ստեղծված իրավիճակի հանդեպ, ինչպիսի միջոցներ եք ձեռք առնելու իրավիճակը շտկելու համար եւ մինչեւ հիմա ձեր անգործությունը ինչով է պայմանավորված»,- ասաց նա:
Վահե Եփրիկյանը նաեւ հայտարարեց, որ իրենց հետաքրքրում է ԲԴԽ անդամների վերաբերմունքը Փաշինյանի դատավորներին ուղղված աղմկահարույց արտահայտությունների վերաբերյալ:
«Բացի նախագահ Քոչարյանի վերաբերյալ գործից՝ մեզ նաեւ հետաքրքրում է հետեւյալ հարցերը, «Ազատություն ռադիոկայանին» տված հարցազրույցում վարչապետ Փաշինյանն օգտագործել է հետեւյալ եզրույթները «փետով տալ դատավորի գլխին», «վնգստալ» եւ նմանաբնույթ այլ արտահայտություններ: ԲԴԽ-ն կոչված է ՀՀ-ում երաշխավորելու արդարադատությունը եւ դատարանների անկախությունը, ինչո՞վ է պայմանավորված այդ արտահայտությունների վերաբերյալ ձեր անգործությունը, ինչու եք արհամարհում ձեր սեփական գործառույթները»,- նշեց նա:
Եփրիկյանը նաեւ անդրադարձավ վերջին շրջանում լայն քննարկումների առիթ դարձած օրենսդրական մի նախաձեռնությանը, ըստ որի ՍԴ դատավորներին հնարավոր է, որ առաջարկվի մինչեւ իրենց պաշտոնավարման ավարտը փոխհատուցել իրենց աշխատավարձերը վերջիններիս հրաժարականի դեպքում. «Ինչպիսի՞ն է ձեր դիրքորոշումը սրա նկատմամբ: Միթե սա պետական մակարդակի կաշառք չէ, միթե սա կոռուպցիոն դրսեւորում չէ եւ միթե սա իր մեջ չի պարունակում իրավական, օրենսդրական եւ առհասարակ արդարության եւ արդարադատության հետ սահմանակցող վտանգներ, ինչպիսի՞ն է ձեր արձագանքը սրա հանդեպ եւս»: Ակցիայի ավարտին աջակիցները վանկարկեցին «Քոչարյան, հերոս» եւ «Նիկոլ, խաբեբա»:
Հիշեցնենք, որ Նիկոլ Փաշինյանն օրեր առաջ «Ազատություն» ռադիոկայանի ուղիղ եթերում, խոսելով դատական համակարգի անկախության մասին, հայտարարեց. «Մեր խնդիրն է ունենալ անկախ դատական համակարգ: Վարչապետ ընտրվելուց հետո ես ասել եմ, որ դատական համակարգի գործերին չեմ միջամտելու, պետք է լինի դատական համակարգի անկախություն, բայց մի տարի հետո պարզվում է, որ դատական համակարգն իրեն ոչ թե անկախ, այլ անտեր է զգում ու ման է գալիս՝ ո՞վ կարող է տեր դառնալ իրեն: Չեմ բացառում, որ նույնիսկ Հայաստանից դուրս են գնում տեր փնտրում՝ մենք անտեր ենք, սովորել ենք, որ մեր գլխին տեր լինի, փետով մեր գլխին տա, երբ որ մեր գլխին փետով չի տալիս, մենք մեզ անտեր ենք զգում... Գնացել են անկյուններում իրենց հին տերերին են փնտրում։ Դռների տակ վնգստում են՝ եկեք մեզ տիրություն արեք, բա մենք 400 հազար դրամով ո՞նց ապրենք, բա լավ չէ՞ր էն ժամանակ. մեզ փող էիք տալիս, մեզ հաց էիք տալիս, մեզ համար խաշ ու քաբաբ էիք ուղարկում։ Այսպիսի դատական համակարգն անհամատեղելի է նոր Հայաստանի հետ»:
Նշենք, որ հուլիսի 16–ին դատարանի որոշմամբ խուզարկություն է իրականացվել Ռոբերտ Քոչարյանի գործով դատավոր, նրան կալանքից ազատելու որոշում կայացրած Դավիթ Գրիգորյանի աշխատասենյակում, արդյունքում առգրավվել էր երեք համակարգիչ, ինչպես նաեւ Ռոբերտ Քոչարյանի գործին վերաբերող կրիչներ եւ փաստաթղթեր։
Պաշտոնապես Դավիթ Գրիգորյանին առաջադրված մեղադրանքը որեւէ առնչություն չունի Ռոբերտ Քոչարյանի գործի հետ, սակայն երկրորդ նախագահի փաստաբանները պնդում են, որ պատճառը հենց Քոչարյանի գործն է։
Հուլիսի 27–ին ԲԴԽ–ն բավարարել էր դատախազության միջնորդությունները եւ համաձայնություն տվել Դավիթ Գրիգորյանի նկատմամբ քրեական հետապնդում հարուցելուն։ ԲԴԽ որոշմամբ՝ դատավորի լիազորությունները կասեցվել էին։ Դատավորի պաշտպանությունը ստանձնել են 100-ից ավելի փաստաբաններ:
Նշենք, որ դատավոր Դավիթ Գրիգորյանը պետք է քններ ՀՀ երկրորդ նախագահ Ռոբերտ Քոչարյանի խափանման միջոցը փոխելու միջնորդությունը: Նրա լիազորությունները կասեցնելուց հետո մինչեւ այժմ պաշտպանների բողոքը որեւէ այլ դատավորի չի մակագրվել:
Ավելի վաղ Operativ լրատվականը հաղորդել էր, «Դատավո՛ր, իջի՛ր» վանկարկումներով բողոքի ակցիա է տեղի ունեցել Ռոբերտ Քոչարյանի աջակիցների կողմից: