Չարենցավանի բազմաթիվ բնակիչներ բաց նամակով դիմել են ՀՀ վարչապետ Նիկոլ Փաշինյանին
Չարենցավանի բազմաթիվ բնակիչներ բաց նամակով դիմել են ՀՀ վարչապետ Նիկոլ Փաշինյանին:
Նամակի բովանդակությանը կարող ենք ծանոթանալ Գևորգ Հակոբյանի Facebook-ի էջից:
Նամակում մասնավորապես ասված է.
«Մեծարգո պարոն վարչապետ,
Հայտնում ենք, որ Հիգենիկ և հակահամաճարակային տեսչության Չարենցավանի տեսչության լուծարումից հետո իրենց զբաղեցրած շենքը մատնվել է անգործության և գտնվում է անմխիթար վիճակում:
Հաշվի առնելով այն հանգամանքը, որ այն կարելի է համարել քաղաքի պատմության վկան (շենքը կառուցվել է 1951 թ., իսկ Չարենցավանը հիմնադրվել՝ 1947 թ., մինչև 1963 թ. սույն շենքում եղել է քաղաքի առաջին դպրոցը, ապա՝ քաղաքային պոլիկլինիկան, իսկ վերջում՝ Սանէպիտ կայան և ՀՀՏ տեսչություն ),
նաև , որ Չարենցավանը չունի մշակութային հիմնարկներ. գործում են միայն արվեստի և երաժշտական դպրոցները,
մշակույթի տունը գտնվելով վերակառուցման փուլում, այժմ վերածվել է փլատակների,
կինոթատրոնի շենքը տրվել է եկեղեցուն, որը համարյա 30 տարի է փակ է և դարձյալ քայքայվում է,
անհասկանալի, թե՞ հասկանալի տրամաբանությամբ քաղաքի պատկերասրահը լուծարվեց և տարածքն օտարվեց,
կարծում ենք, որ այդ շենքը պետք է պահպանվի և հանդիսանալով Չարենցավանի պատմության վկան, այն լավագույնս կծառայի որպես Չարենցավան խոշորացված համայնքի պատմության թանգարան և մշակութային օջախ:
Այս հարցը քննարկվել է տարբեր հարթակներում և սոցիալական ցանցերում և ստացել՝ հասարակության տարբեր խավերի հավանությանը:
Տեղեկացնում ենք նաև,որ գործընթացներ է գնում շենքը մասնավորեցնելու համար:
Մեծարգո պարոն վարչապետ,
խնդրում ենք Ձեր միջնորդությունը շենքը Չարենցավան համայնքին վերադարձնելու համար:
Նոր Չարենցավան, նոր համայնք նախաձեռնող խումբ»: