Սկսելու ենք Կարգին Հայկոյի իմպիչմենտի գործընթացը. Սոնա Աղեկյան
Երեւանի քաղաքապետարանն ասում է՝ չունենք համապատասխան տեխնիկա, բայց «Սանիթեքի» ավտոպարկում կայանված է մոտ 20 աղբատար մեքենա։ Այս մասին այսօր՝ օգոստոսի 9-ին, լրագրողների հետ հանդիպմանն ասաց նախօրեին աղբահանության հարցով Երեւանի քաղաքապետարանի դիմաց իրականացված բողոքի ակցիայի մասնակից Ռաֆայել Ռուստամյան։
«Մի քանի օր առաջ քաղաքապետարանը ձեռք է բերել «Կամազ» մակնիշի մեքենաներ։ Ես ինքս եղել եմ «Սանիթեքի» ավտոպարկում, որտեղ կայանված էր մոտ 20 աղբատար մեքենա, որոնք այս պահին չեն շահագործվում։ Ինչո՞ւ են պատճառաբանում՝ չունենք մեքենաներ, ինչո՞ւ քաղաքապետարանը չի վերահսկում այդ ամենը։ Չեմ ընդունի այն պատասխանը, որ «Սանիթեքը» պատճառաբանի, թե ի վիճակի չեն շահագործման, քանի որ 5 միլիարդ 2 հարյուր միլիոն դրամը պայմանագրով վճարվում է զուտ նրա համար, որ իրենք հոգան իրենց ծախսերը, այդ գումարի մեջ մտնում է նաեւ մեքենաների համապատասխան սպասարկումը։ Այս մեքենաները կես մետր այդ 1-2 ամսվա ընթացքում չեն շահագործվել»,- ասաց ակցիայի մասնակիցը։
Նրա խոսքով՝ ընկերության ավտոպարկը տեղակայված է 2 բազմաբնակարան շենքերի կողքին, որտեղ գարշահոտություն է տիրում։
«Բնակիչները տան պատուհաններն անգամ չեն բացում հոտից, աղբատար մեքենաները բերում լվանում են, այդ կեղտաջրերը թափվում են այդ տարածքում, եւ այս շոգից չորանալով վատ հոտ է տարածվում»,– ասաց նա։
Երեւանի ավագանու նախկին անդամ Սոնա Աղեկյանն էլ ասաց, որ երեկ՝ Երեւանի քաղաքապետարանի դիմաց իրականացրած ակցիան ուներ բացատրական բնույթ. «Մարդիկ բացատրելով, աղմկելով չեն հասկանում, մենք որոշեցինք իրենց մատչելի տարբերակով տանել եւ ասել, որ բացի այն աղբը, որը կա Երեւանում, կան նաեւ շինարարական աղբեր, որոնց մասին դուք լռում եք։ Մեր ամբողջ կանաչածածկ տարածքները վերացնում եք դիտավորյալ։ Մենք արձանագրեցինք ապօրինի շինաղբավայրերի գոյություն, որոնք ոչ մի սահմանազատում չունեն, այդ շինաղբերը գնում են ու թափվում մեր բնությունը աղտոտելով, ոչնչացնելով չիչխանի կանաչ այգիները»։
Ինչ վերաբերում է ակցիայի ընթացքում տեղի ունեցած միջադեպին՝ Աղեկյանն ասաց, որ քաղաքապետարանի աշխատակիցները դիտավորությամբ են ուղարկել այդ երկու քաղաքացինեին, որոնց և ակցիա իրականացնողների միջև վեճ էր տեղի ունեցել։
«Այդ 2 անձինք փորձեցին սադրել, մենք էլ ասացինք՝ եթե ուզում եք սադրանք, ուրեմն կստանաք։ Փոխադարձ վիրավորանքներ չեն հնչել, վիրավորանքներ հնչել են միայն իրենց կողմից։ Մենք միայն պատասխանել ենք իրենց գործողություններին»։
Քաղաքապետարանի հավաքարարները մեր մաքրուհիներն են, որոնց մենք վարձել ենք, գումար ենք տալիս, որ մաքրեն, եւ կապ չունի՝ քաղաքապետը Տարոն Մարգարյան անունն է կրում, թե՝ Հայկ Մարության»,– ասաց նա։
Նրա խոսքով՝ Երևանի քաղաքապետարանն ու ավագանին չունեն քաղաքական կամք, պրոֆեսիոնալ թիմ, որն ունակ է լուծելու երևանյան խնդիրները։
« Կարևոր է քաղաքի աղբահանությունը, սակայն ոչ պակաս կարևոր է վերելակների վիճակը, հանրային տրանսպորտի կարգավորումը, կանաչապատումն ու կառուցապատումը, որոնց մասին պարոն քաղաքապետը բեմի վրա վերից վար էր ցատկոտում, հետո՝ աջից ձախ էր ցատկոտում իր մասնագիտությանը համապատասխան։ Ամենայն հարգանքով վերաբերվելով իր մասնագիտությանը, ասում ենք, որ Ռուզանը սպասում է գրկաբաց, որպեսզի Գառնիկը շուտով խոպանից վերադառնա։ Գառնիկի խոպանից տուն վերադառնալու գործընթացը սկսված է, և շուտով մենք կհայտարարենք՝ եթե քաղաքապետը չգիտակցի, որ ինքն արդեն քաղաքական պաշտոն է ստանձնել, և ունի խոստումներ, որոնք պետք է սեղմ ժամկետում իրագործի, անկախ նրանից՝ իրեն թողնում են, թե չեն թողնում։ Եթե այսքանը չգիտակցեց, սկսելու ենք Կարգին Հայկոյի իմպիչմենտի գործընթացը»,– ասաց նա։
Հիշեցնենք, որ նախօրեին Սոնա Աղեկյանն իր համակիների հետ գնացել էին Երեւանի քաղաքապետարան՝ իրենց հետ տանելով ավելներ եւ կանացի հագուստ, որը նրանց խոսքով՝ բերել էին քաղաքապետ Հայկ Մարությանի համար։ Ակցիայի ժամանակ տեղի էր ունեցել միջադեպ։ Մի քաղաքացի վեճի էր բռնվել ակցիա իրականացնողների հետ, որի ընթացքում, քաղաքացու խոսքով, Սոնա Աղեկյանի համակիրներից Գագիկ Սարուխանյանը հարվածել է իրեն։ Ակցիայի մասնակիցներին բերման էին ենթարկել ոստիկանություն, ապա՝ ազատ արձակել։