BBC-ի հոդվածի հեղինակն ինքն է նշում՝ փաստարկները հիմնված են միայն քննիչների հարցերի վրա. Քոչարյանի փաստաբաններ

ՀՀ երկրորդ նախագահ Ռոբերտ Քոչարյանի փաստաբանները չեն մեկնաբանում BBC-ում 2008 թվականի մարտի 1-ի իրադարձությունների վերաբերյալ հոդվածի պատվիրված բնույթի մասին հարցը:

Օգոստոսի 7-ին մամուլի ասուլիսին մեկնաբանելով հայտնի բրիտանական հրատարակությունում հրապարակումը, փաստաբան Արամ Օրբելյանը ուշադրությունը հրավիրեց այն հանգամանքին, որ հոդվաածի հեղինակը ինքն է նշում՝ փաստարկները հիմնված են միայն քննիչների հարցերի վրա:

Նախկին նախագահի փաստաբանների տրամադրության տակ գտնվող նյութերում չկան հանգամանքներ, որոնք մատնանշում են ինչ-որ ստորաբաժանման մասնակցությունը ողբերգական իրադարձություններին, որն էլ մարդկանմց մահվան պատճառ է դարձել:

BBC-ն՝ վկայակոչելով իր տրամադրության տակ հայտնված որոշ նյութեր եւ հարցաքննություններ, գրում է, որ Մարտի 1-ի գործով քննիչները կարծում են՝ ցուցարարների վրա կրակ են բացել ղարաբաղյան ուժայինները, որոնց հրամանատարը եղել է գեներալ Կարապետյանը (գործով որպես վկա է ներգրավված): Հարցաքննություններին քննիչները պնդել են, որ նրա ջոկատը տեղավորվել է նախագահի աշխատակազմի նկուղում: Քննությունը կարծում է, որ ջոկատին այցելել են երկու նախագահները՝ Ռոբերտ Քոչարյանը եւ Սերժ Սարգսյանը: Քննիչները նաեւ ստուգում են երկու ազդեցիկ գործարարներ Գագիկ Ծառուկյանի եւ Սամվել Ալեքսանյանի դերը, որոնք կարող էին ֆինանսավորել ցույցի ցրման օրերին ղարաբաղյան ուժայինների Երեւանում գտնվելու ծախսերը: Դրա հետ մեկտեղ հեղինակը գրում է, որ չի կարողացել ցուցարարների սպանությունների բոլոր հանգամանքների անկախ հաստատումը ստանալ:

Այս կապակցությամբ փաստաբան Հովհաննես Խուդոյանը հիշեցրեց, որ քննիչի հարցերը դեռեւս չեն նշանակում փաստ: «Եթե քննիչն ինչ-որ բան է պնդում, դա դեռ չի նշանակում, որ նյութերում դրա հաստատումը կա: Պնդում եմ, որ մեզ տրամադրված նյութերում չկան ցուցմունքներ, որոնք կհաստատեին քննիչի հարցերը»,- շեշտեց փաստաբանը՝ հավելելով, որ եթե աննշան հաստատում լիներ, այն վաղուց տարբեր ձեւերով կտարածվեր: Նրա խոսքով՝ քննիչների աշխատանքի որակի մասին կարելի է դատել ավելի վաղ հրապարակված նախկին նախագահներ Սերժ Սարգսյանի եւ Լեւոն Տեր-Պետրոսյանի հարցաքննությունների հատվածներով, ուրիշ հարցաքննություններով, որոնց ժամանակ քննիչը զինվորականներին տալիս է իրավաբանական բնույթի հարցեր:

Փաստաբան Արամ Օրբելյանը հիշեցրեց, որ հանրահայտ փաստերը եւս հակասում են ինչ-որ ստորաբաժանման գոյության կոնցեպցիայի առաջքաշմանը, որը դարձել է 10 մարդու մահվան պատճառը: «Մահվան պատճառները նույնպես տարբեր են՝ «Չերյոմուխա», հրազենային վիրավորում, վիրավորումներ հասցված բութ առարկայով, նռնակից»,- հիշեցրեց փաստաբանը: Նրա խոսքով՝ ակնհայտ է որոշ մանիպուլյացիան. «Չեմ ասում, որ սա մանիպուլյացիա է BBC-ի կողմից: Մենք կապ կհաստատենք եւ կպարզենք, թե ինչու հենց հիմա հայտնվեց այդ հոդվածը: Սակայն կարող եմ պնդել, որ թվարկվածը չի համապատասխանում փաստերին եւ չի բխում գործի նյութերից»: Փաստաբանը միաժամանակ նշեց, որ տեսականորեն այս ամենը պատահական չէ: Նրա խոսքով՝ ժամանակը ցույց կտա՝ սա պատվե՞ր էր, թե՞ ոչ: