Ալավերդցիների առողջության հաշվին միլիոններ է դիզել. «Թեղուտի վերաբացում» նախաձեռնությունը երթ է իրականացրել
«Թեղուտի վերաբացում» նախաձեռնությունը Լոռու մարզի Ալավերդի քաղաքում այսօր՝ օգոստոսի 5-ին, խաղաղ ակցիա էր իրականացնում՝ պահանջելով, որ «Վալլեքս» խմբի ընկերությունների նախագահ Վալերի Մեջլումյանն արհեստական խոչընդոտներ չստեղծի Թեղուտի հանքավայրի շահագործման ուղղությամբ։ Ակցիայի մասնակիցներն ասում էին, որ ակցիան տարածաշրջանի ամենաշատ աշխատատեղերի պահպանման համար է:
«Վալերի Մեջլումյանը տապալել է Թեղուտի հանքավայրի շահագործումը, եւ 15 ամիսների ընթացքում իր աշխատակիցների միջոցով, արհեստական խոչընդոտներ է ստեղծել հանքավայրի վերաբացման համար։ Նա տապալել է Ալավերդու պղնձաձուլարանը, եւ 25 տարվա մեջ ոչ մի ներդրում չի կատարել։ Ալավերդցիների առողջության հաշվին այս մարդը միլիոններ է դիզել, աշխատող ժողովրդին վերաբերվել է իբրեւ ծառայի՝ կախվածության մեջ գցելով նրանց։ Նա տիրանալով քաղաքի կարեւորագույն օբյեկտներին՝ հասցրել է դրանք ավերակների, մասնավորապես, Ալավերդու ճոպանուղին, մարզադաշտը, կենտրոնական հյուրանոցի շենքը, եւ մի շարք այլ շինություններ։ Նա դավաճանել է սեփական տարածաշրջանը եւ ժողովրդին, եւ ինքը տեղ չունի մեր քաղաքում»,- ասաց ակցիայի մասնակիցներից մեկը։
Ակցիայի մասնակիցներն ասացին, որ թույլ չեն տա իրենց զրկել աշխատանքից. «Այս մարդը կործանել է մեր մանկությունն ու փչացրել մեր առողջությունը։ Մենք հիմա թույլ չենք տա, որ նույնը լինի մեր երեխաների հետ. սա կլինի մեր վերջին զգուշացումը։ Փորձում է ժողովրդին զրկել աշխատանքից»։
Խաղաղ ակցիայի մասնակիցները քայլերթ եւ ավտոերթ իրականացրին Ալավերդի քաղաքում, եւ դրանով ավարտեցին ակցիան։
Հիշեցնենք, որ ՀՀ կառավարության որոշմամբ՝ հուլիսի 8-ից «Թեղուտ» ՓԲԸ-ն շարունակելու է շահագործվել։ Որոշումից հետո, ամբողջ ծավալով մեկնարկել է աշխատանքները: Նշենք, որ «Թեղուտ» ՓԲԸ-ի գործունեությունը դադարեցրել էր դեռևս մեկ տարի առաջ։