Apple-ը ժամանակավորապես դադարեցրել է Siri-ի օգտատերերի անանուն հարցումները

Apple-ը ժամանակավորապես դադարեցրել է Siri-ի օգտատերերի անանուն հարցումները որոնք ինչպես նախկինում հաղորդվում էր, ընկերությունն ուսումնասիրում էր ձայնային օգնականի աշխատանքը բարելավելու համար: The Verge պորտալը հայտնում է, որ այս որոշումը հետեւել է The Guardian պարբերականի հրապարակմանը, որում Apple-ի աշխատակիցը պատմել է, որ ընկերության կապալառուները հաճախ լսում են օգտատերերի գաղտնի զրույցները եւ տեղեկանում նրանց բժշկական ախտորոշումներին, քրեական ակտիվությանը եւ ինտիմ կյանքին:

«Մենք ձգտում ենք առավելագույնս բարելավել ձայնային օգնական Siri-ի հնարավորությունները՝ դրա հետ մեկտեղ պաշտպանելով օգտատերերի գաղտնիությունը»,- պորտալին հղած իր ուղերձում նշել է Apple-ի ներկայացուցիչը:

Ընկերությունից հավաստիացրել են, որ ստուգում են սկսել եւ ամբողջ աշխարհում կասեցրել են Siri-ի ատեստացիայի ծրագիրը: Դրանից բացի, ծրագրային ապահովման ապագա թարմացումների շրջանակում օգտատերերին թույլ կտան ինքնուրույն որոշել՝ մասնակցեն արդյոք ձայնային օգնականի գնահատմանը: Ընդ որում՝ Apple-ից չեն հստակեցրել, թե արդյոք սա նշանակում է, որ ընկերությունն իր սերվերներում այլեւս չի պահպանում օգտատերերի գրառումները:

Ավելի վաղ հաղորդվել էր, որ ձայնային գրառումների շարքում, որոնք հայտնվում են Apple-ի կապալառուների տրամադրության տակ, հանդիպում են ոչ միայն որոնման հարցումներ: Համակարգում սխալների պատճառով, որոնք հանգեցնում են բարձրախոսի սխալ գործարկման, գրառումներում լսվում են մարդկանց խոսակցությունները: Ընդ որում՝ նշվում էր, որ դա ոչ մի կերպ չի ազդել օգտատերերի գաղտնիության վրա, քանի որ արտահաստիքային աշխատակիցները նրանց Apple ID-ի մասին տեղեկություն չեն ստացել: