ՃՏՊ կամ դժբախտ պատաարնե՞ր պետք է լինեն, որ գոնե որոշ ժամանակով տրանսորտային կանգառներում առկա խնդիրները կարգավորվեն
2019թ. հունվարի 1-ից հուլիսի 31-ն ընկած ժամանակահատվածում ներմուծվել է 68 000 ավտոմեքենա, իսկ 2018թ. ընդամենը 67 000 ավտոմեքենա: Այս մասին կառավարության նիստի ժամանակ ասել է ՀՀ ՊԵԿ նախագահ Դավիթ Անանյանը:
Իսկապես, տարեցտարի հանրապետությունում ներմուծվող ավտոմեքենաների քանակի աճ է գրանցվում, դրանց թիվը վաղուց հատել է կես միլիոնը:
Հենց դրանով են պայմանավորված մայրաքաղաքում խցանումներն ու երթևեկության ծանրաբեռնվածությունը: Սակայն տրանսպորտի աշխատանքի և ավտոմեքենաների թվի աճի միջև ուղիղ կապի հարցը շրջանցվում է:
Հենց տրանսպորտի վատ աշխատանքով է պայմանավորված թեթև մարդատար ավտոմեքենաների թվի աճն առաջին հերթին Երևանում: Ստիպված ենք հաստատել՝ Երևանում հասարակական տրանսպորտից օգտվելն անհարմար է, տհաճ, հաճախ վտանգավոր, հաճախ էլ՝ պարզապես նվաստացուցիչ:
Բարդ հարց՝ ո՞ւմ է հանձնարարված ուղևորների տեղափոխումը: Դատելով ճանապարհին վարորդների մեծ մասի պահվածքից՝ կարելի է ասել, որ ճանապարհային երթևեկության կանոնների մասին նրանց պատկերացումներն ընդհանուր են: Վերջերս համացանցում տարածվեցին տեսագրություններ վարորդների «քաջությունների» մասին, հատկապես «առանձնացողներն» աշխատանքից ազատվեցին:
Տրանսպորտի թվի պակասի պատճառով ուղևորները խորամանկություն են անում՝ փորձելով առաջինը կանգնել կանգառում: Արդյունքում կանգառը հասնում է կանգառի իրական վայրից մի քանի մետր հեռու: Շատ ուղևորներ տեղափոխելու վարորդների ձգտումը հասնում է նրան, որ նրանք կանգնում են որտեղ հարմար է՝ թքած ունենալով անվտանգության տարրական կանոնների վրա: Մեծ մասը ուղևորներին իջեցնում է երկրորդ կամ երրորդ գծի վրա:
Իրավիճակը բարդացնում է այն փաստը, որ կանգառների զգալի մասը գտնվում է անմիջապես խաչմերուկնեից հետո: Եթե նույնիսկ երթուղայիններն ու ավտոբուսները կանգնում են առաջին գծի վրա, դրանցից հետո եկող մեքենաները մտնում են խաչմերուկի հոսքի մեջ, իսկ արդյունքը՝ խցանում, լավագույն դեպքում, իսկ վատագույն դեպքում՝ ՃՏՊ: Իհարկե, լուրջ ՃՏՊ-ից հետո որոշ ժամանակով կարգուկանոն է հաստատվում, ապա ամեն ինչ կրկին վերադառնում է իր հունին, ձևավորվում է անպատժելիության և անփութության արատավոր շրջան:
Հիշեցնենք, ներկայիս քաղաքապետ Հայկ Մարությանի նախընտրական խոստումներից մեկն էլ քաղաքային տրանսպորտի պարտադիր բարեկարգումն էր: