Քաղավիացիան գրեթե բացառում է, որ «Զվարթնոց» օդանավակայանի տարածքում Բոինգ 737 օդանավին մոտեցած անօդաչու թռչող սարքը եղել է ՀՀ կամ ՌԴ Զինված ուժերինը.Tert.am

Քաղաքացիական ավիացիայի կոմիտեն Երևան ուղևորվող Բոինգ 737 օդանավի հետ գրեթե հավասար բարձության վրա գտնվող անօդաչու սարքի հետ կապված նոր մանրամասներ չունի:

Այս մասին Tert.am-ի հետ զրույցում ասել է Քաղաքացիական ավիացիայի կոմիտեի օդանավակայանների սերտիֆիկացման և օդային երթևեկության կազմակերպման վարչության առաջատար մասնագետ Տիգրան Սերոբյանը: Նրա խոսքով՝ իրենք ահազանգը ստացել են ինքնաթիռի անձնակազմի կողմից և սահմանված կարգի համաձայն՝ տեղեկացրել իրավապահ մարմիններին:

«Աշխատանքներ են տարվում, որ հնարավորության դեպքում բացահայտվի, բայց պետք է հասկանալ, որ դա շատ դժվար է բացահայտել, քանի որ ոչ միայն ՀՀ տարածքում, այլև ամբողջ աշխարհում խնդիրն առկա է: Դեռևս հայտնի չէ՝ ում է պատկանել»,- ասաց նա:

Սերոբյանը նկատել է, որ դեպքի հետ կապված լինում են մեկնաբանություններ, թե դա եղել է հայկական կամ ռուսական ԶՈւ կողմից: Սակայն նա շեշտեց, որ այս տարբերակները քիչ հավանական են:

«ՊՆ-ի կողմից իրականացվող ցանկացած թռիչքի, ընդհանրապես ՀՀ տարածքում ռազմաօդային ուժերի կողմից կատարվող թռիչքի մասին իմանում ենք: ՀՀ քաղավիացիայի, ԶՈւ շտաբի պետի, ինչպես նաև ռազմաօդային հրամանատարի միջև կա համատեղ հրաման, և մենք ցանկացած թռիչքի վերաբերյալ տեղեկատվություն ունենում ենք: Այսինքն՝ բացառվում է, որ ՊՆ-ի կողմից լինի»,- նշեց Սերոբյանը:

Ինչ վերաբերում է պրոֆեսիոնալների թռիչքների վարկածին, այսինքն՝ անձիք, որոնք փորձարկումներ են անում նաև հետագայում որպես զենք ՊՆ-ին վաճառելու համար, Սերոբյանը շեշտեց, որ սա էլ գրեթե բացառված է, քանի որ նրանց հետ էլ կապի մեջ են:

«Նաև այնքանով է բացառված, որ եթե անձը զբաղվում է դրանով, ապա շատ լավ գիտակցում է, թե այդ թռիչքն ինչ վտանգներ է պարունակում: Անձամբ իմ սուբյեկտիվ կարծիքով՝ ինչ-որ մեկն է եղել, որ տանը փորձել է ինչ-որ բաների հասնել, քանի որ հասկացող մարդը նման բան չէր անի: Այնպես չէ, որ, օրինակ, DJI ընկերության դրոն է, որ խանութից գնել ու թռցրել են, սա չեն կարող անել, քանի որ սահամափակումներ կան, իսկ այս դեպքում այդ սահամափակումները հանված են եղել»,- շարունակեց Տիգրան Սերոբյանը:

Միևնույն ժամանակ վերջինս նկատեց, որ սա միակ խախտումը չէ: Նա օրինակ բերեց 2park.am-ում տեղ գտած գիշերային Երևանի նկարը:

«Մոտավոր հաշվարկներով՝ այդ թռիչքը գետնի մակերևույթից 1500 մետր բարձության վրա է, սա էլ կոպիտ խախտում է, հիմա միջոցներ են ձեռնարկվում անձին բացահայտելու ուղղությամբ: Այսինքն՝ պարտադիր չէ, որ զինվորական լինի, կարող է ինչ-որ մեկը լինել, որը միջամտել է ու համակարգի ամբողջականությունը խախտել և թռիչնքեր կատարել»,- եզրափակեց Տիգրան Սերոբյանը:

Հիշեցնենք, որ Քաղաքացիական ավիացիայի կոմիտեն հայտարարություն էր տարածել, որ սույն թվականի հուլիսի 19-ին Երևան ուղևորվող B737 օդանավի անձնակազմը Երևանի Զվարթնոց օդանավակայան մոտեցման գործընթացի իրականացման ժամանակ, գտնվելով Արմավիրի մարզի Դալարիկ համայնքի շրջակայքում` գետնի մակերևույթից շուրջ 1000 մետր բարձրության վրա (մոտ 1900 մետր բացարձակ բարձրության), զեկուցել է օդանավից ձախ հատվածում նույն բարձրության և բավականին մոտ գտնվող հեռակառավարվող անօդաչու համակարգի (DRONE) վերաբերյալ: