Սեուլը Տոկիոյից պահանջել է հանել առևտրային սահմանափակումները
Հարավային Կորեայի արտաքին գործերի նախարար Կան Գյոն Հվան հինգշաբթի Հարավարեւելյան Ասիայի պետությունների ասոցիացիայի (ԱՍԵԱՆ) համաժողովի շրջանակում Ճապոնիայի ԱԳՆ ղեկավար Տարո Կոնոյի հետ բանակցությունների ընթացքում պահանջել է հանել առեւտրային սահմանափակումները, որոնք Տոկիոն մտցրել էր Սեուլի հանդեպ, տեղեկացնում է ՏԱՍՍ-ը՝ հղում կատարելով Kyodo-ին։
Նշվում է, որ Կան Գյոն Հվան նաեւ պահանջել է իր ճապոնացի գործընկերոջից վերանայել Հարավային Կորեան այն երկրների ցուցակից հանելու որոշումը, որոնցում առանց սահմանափակումների, պարզեցված սխեմաներով մատակարարվում են ճապոնական նանոնյութեր եւ բարձրտեխնոլոգիական բաղադրիչներ։ Ավելի վաղ Ճապոնիայի կառավարությունը հայտարարել էր, որ պատրաստվում է համապատասխան քայլի դիմել օգոստոսի 2-ին։
Ճապոնիայի ԱԳ նախարարը, ի պատասխան այդ պահանջների, ընդգծել է, որ Տոկիոյի նախաձեռնած քայլերն ուղղված են Ճապոնիայի ազգային անվտանգության ապահովմանն ու տեղավորվում են միջազգային իրավունքի նորմերի շրջանակում։
Հուլիսի 1-ին Տոկիոն խստացրել է Հարավային Կորեա երեք տեսակ նյութերի վերահսկողությունը, որոնք անհրաժեշտ են կիսահաղորդիչների եւ տարբեր գաջեթների արտադրության համար։ Առիթ են հանդիսացել, մասնավորապես, կասկածները, որ այդ բաղադրիչների մի մասը կարող է անլեգալ մատակարարվել Կորեայի Հանրապետությունից Հյուսիսային Կորեային։ Սեուլը կտրականապես հերքում է նման հնարավորությունը։
Տոկիոյի եւ Սեուլի հարաբերությունները սրվել են 2018 թվականի աշնանը, երբ Կորեայի Հանրապետության Գերագույն դատարանը պարտավորեցրեց ճապոնական Nippon Steel & Sumitomo Metal ընկերությանը փոխհատուցում վճարել կորեացի չորս քաղաքացու Երկրորդ համաշխարհային պատերազմի ժամանակ նրանց աշխատել պարտադրելու համար։ Ճապոնիայի կառավարությունը մերժել է դատարանի որոշումը՝ ընդգծելով, որ այդ խնդիրը վերջնականապես լուծվել է Տոկիոյի եւ Սեուլի հարաբերությունների կարգավորմամբ 1965-ին։ Այն ժամանակ ստորագրված երկկողմանի համաձայնագրի համաձայն՝ նման գործերը նախատեսում են երրորդ երկրների ներկայացուցիչների ներգրավում գործընթացին։