Իշխանությունները խոսելով անցյալի սխալների մասին՝ հանրությանը թույլ չեն տալիս շրջել այդ էջը. Գեւորգ Ղուկասյան45

Հայաստանի երկրորդ նախագահ Ռոբերտ Քոչարյանը չի կարող երկրում քաղաքական գործընթացների շրջանակից դուրս լինել: Հուլիսի 31-ին լրագրողների հետ հանդիպման ժամանակ այս մասին ասաց ՀՅԴ «Նիկոլ Աղբալյան» Ուսանողական միության վարչության ներկայացուցիչ Գեւորգ Ղուկասյանը:

Նրա խոսքով՝ ՀՅԴ կուսակցությունն արդեն 2 բանաձեւ է ընդունել այն մասին, որ քաղաքական կոնսոլիդացիա է սկսում: Նա նշեց, որ դատական համակարգի շուրջ գործընթացները կապված են իշխանությունների մոտ պետական ամբողջ ապարատի բարեփոխումների, այդ թվում՝ բուն դատական համակարգի նկատմամբ հայեցակարգային մոտեցումների բացակայության հետ: «Բոլոր որոշումները իրավիճակային բնույթ ունեն, անհնար է որեւէ պետական արդյունավետ կառավարման մասին խոսել դատական իշխանության վրա աննախադեպ ճնշման պարագայում: Բանը հասել է անգամ մինչեւ Սահմանադրական դատարանի վրա ճնշում գործադրելուն, ինչն ավելի շատ հարվածեց երկրի միջազգային հեղինակությանը: Ակնհայտ է, որ իշխանությունների գործողություններն ուղղված են ոչ թե առողջ դատական համակարգի ձեւավորմանը, այլ միայն իրեն հնազանդեցնելուն: Անհասկանալի է նաեւ այն, թե ինչու երկրի ղեկավարությունը բարեփոխումների հարցը չի դիտարկում ոչ միայն դատական, այլեւ ամբողջ դատաիրավական համակարգի համար, որի մի մասը գործադիր իշխանության ենթակայության ներքո է»,- նշեց նա:

Գեւորգ Ղուկասյանը նշեց, որ իշխանությունները խոսելով անցյալի սխալների մասին՝ հանրությանը թույլ չեն տալիս շրջել այդ էջը եւ այսօր անցնել ստեղծագործ գործողությունների: