Ճարտարապետների խումբն առաջարկել է Նոտր Դամի դիմացի հրապարակում ժամանակավոր տաճար կառուցել

Ֆրանսիայում ներկայացրել են Նոտր Դամի վերականգնման ընթացքում ժամանակավոր տաճարի նախագիծ՝ միլիոնավոր հավատացյալների եւ զբոսաշրջիկների համար: Դրա հեղինակներն են Փարիզում տեղակայված Gensler բյուրոյի ճարտարապետները, փոխանցում է ՏԱՍՍ-ը:

«Նոտր Դամի տաղավար» անվանումն ստացած նախագիծը Փարիզի Աստվածամոր տաճարի վանահայր Պատրիկ Շովեի՝ Նոտր Դամի «ծխականների համար ժամանակավոր տուն կառուցելու» կոչի արձագանքն է դարձել, որը սաստիկ տուժել էր այս տարվա ապրիլին տեղի ունեցած հրդեհի ժամանակ:

France-Presse գործակալությունը նշում է, որ Փարիզի իշխանությունների կողմից նախագծին հավանություն տալու դեպքում ժամանակավոր տաճարի կառուցման համար կպահանջվի մոտ 6 ամիս, որի մակերեսը կկազմի 1,7 հազար քառ.մետր: Նախագծի հեղինակներն առաջարկում են տաղավարը կառուցել Նոտր Դամ տաճարի դիմացի հրապարակում: Նախագծի համաձայն՝ շենքը կարող է օգտագործվել ոչ միայն կրոնական ժամերգությունների, այլեւ ցուցահանդեսների եւ համերգների անցկացման համար:

Ենթադրվում է, որ տաղավարը կառուցվելու է դիմացկուն նյութերից: Ճարտարապետական բյուրոյի ներկայացուցիչ Ֆիլիպ Պարեն ընդգծել է, որ «շինարարության մեջ այրված փայտի օգտագործումը որոշ խորհրդանիշ կդառնա, այս հնագույն տեխնիկան փայտը պաշտպանում է կրակի ազդեցությունից»: «Հրդեհի դեպքում կառուցվածքի ամրությունը միայն ուժեղանում է»,- շեշտել է նա: Բյուրոյի ներկայացուցչի խոսքով՝ շենքի պատերի եւ տանիքի կառուցման համար այնպիսի նյութեր կօգտագործեն, ինչպիսին են պոլիկարբոնատը եւ պոլիտետրաֆտորէթիլենը:

Տաճարի մի մասը բաղկացած կլինի շարժական պանելներից, ինչն ըստ նախագծի հեղինակների, թույլ կտա ըստ անհրաժեշտության փոխել շենքի կոնստրուկցիան: Ճարտարապետների մտահաղացմամբ երկու մեծ շարժական պանելները կտեղադրվեն զոհասեղանի հետեւում, որպեսզի այցելուները կարողանան տեսնել Նոտր Դամ տաճարը:

Պարեի խոսքով շենքը հետագայում կարող է օգտագործվել այլ նպատակների համար նաեւ այլ քաղաքներում: Մեր նախագծի գաղափարը պարզության եւ համեստության փիլիսոփայություն է,- ընդգծել է ճարտարապետը:

Ապրիլի 15-ի երեկոյան Նոտր Դամ տաճարում հրդեհ էր բռնկվել, հրդեհն ամբողջությամբ հաջողվել էր մարել միայն հաջորդ առավոտյան: Նախնական տվյալներով՝ բռնկումը տեղի էր ունեցել տաճարի սրածայր աշտարակի շրջանում մինչ օրս չպարզված պատճառներով: Կրակն ամբողջությամբ ոչնչացրել էր փայտե տանիքը եւ սրածայր աշտարակը, որն ընկել էր քարե կամարի վրա եւ երեք տեղից վնասել այն: Աշտարակի մի մասն այրվել էր արդեն տաճարի հատակին:

Հրդեհից մի քանի օր անց Նոտր Դամի վանահայրն առաջարկել էր այն վերակառուցելու ժամանակ հավատացյալների եւ զբոսաշրջիկների համար խորհդանշական տաճար կառուցել: Այն ժամանակ ինչպես նշել էր Շովեն, Փարիզի քաղաքապետ Ան Իդալգոն աջակցել էր այդ գաղափարին եւ համաձայնվել հրապարակի մի հատվածը տաճարի կառուցմանը տրամադրելու թույլատվություն տալ: