Մանվել Գրիգորյանի համար որպես գրավի չափ պաշտպանն առաջարկեց մինչև 25 մլն դրամը

ԵԿՄ վարչության նախկին նախագահ, գեներալ Մանվել Գրիգորյանի պաշտպան Լևոն Բաղդասարյանն այսօր՝ հուլիսի 30–ին հերթական անգամ միջնորդեց դատարանին փոխել իր պաշտպանյալի նկատմամբ ընտրված կալանավորումը այլընտրանքային խափանման միջոց գրավով։ Որպես գրավի չափ պաշտպանն առաջարկեց մինչև 25 մլն դրամը։

Ըստ պաշտպանի՝ գրավի միջնորդության համար հիմք է հանդիսացել այն հանգամանքը, որ Մանվել Գրիգորյանը «Նաիրի» ԲԿ–ում օրեր առաջ համալիր հետազոտության է ենթարկվել, ինչի արդյունքում պարզվել է, որ Գրիգորյանի հիվանդությունների հետ կապված բացասական դինամիկան կրկնապատկվել է։

Միջնորդության դեմ առարկեց գործով մեղադրող դատախազ Վահե Դոլմազյանը։ Դատարանը հեռացավ միջնորդության վերաբերյալ որոշում կայացնելու. այն կհրապարակվի քիչ անց։

Հիշեցնենք, որ հունիսի 6–ին Մանվել Գրիգորյանը ծայրահեղ ծանր վիճակով «Դատապարտյալների հիվանդանոց» ՔԿՀ–ից տեղափոխվել էր «Սուրբ Գրիգոր Լուսավորիչ» ԲԿ, իսկ օրեր անց՝ «Նաիրի» ԲԿ։

Համաձայն մեղադրական եզրակացության՝ Մանվել Գրիգորյանը ապօրինի կերպով՝ «Զենքի մասին» ՀՀ օրենքով նախատեսված սահմանափակումների շրջանցմամբ, կնոջ՝ Նազիկ Ամիրյանի, որդու՝ Արման Գրիգորյանի եւ քննությամբ չպարզված այլ անձանց հետ նախնական համաձայնությամբ, ապօրինի կերպով ձեռք են բերել, փոխադրել եւ իրենց պատկանող երեք տներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր, ինչպես նաեւ կատարել է տարբեր տեսակի հափշտակություններ։

Նա մեղադրվում է 2016թ.-ի ապրիլյան քառօրյա պատերազմի եւ դրան հաջորդած օրերին Արցախի Հանրապետության սահմանների պաշտպանությունն իրականացնող զինվորականների եւ կամավորների կարիքները հոգալու նպատակով հատկացված գույքը յուրացնելու մեջ։