Դատավորի աշխատասենյակը կնքելը լուրջ իրավական հետևանքներ է առաջացրել. Գեորգի Մելիքյան

Դավիթ Գրիգորյանի աշխատասենյակում քննչական գործողությունները սկսվել և իրականացվել են առանց նրա գիտության, մինչդեռ օրենսդրության պահանջն է առնվազն մեկ օր առաջ խուզարկության մասին իրազեկել դատավորին և ԲԴԽ–ին։ Այս մասին այսօր՝ հուլիսի 26–ին լրագրողների հետ հանդիպմանը հայտարարեց Երևանի ընդհանուր իրավասության դատարանի դատավոր Դավիթ Գրիգորյանի փաստաբան Գեորգի Մելիքյանը։

«Հուլիսի 16–ին, ժամը 14:00–ի սահմաններում նրա աշխատասենյակ է ներկայացել Հատուկ քննչական ծառայության քննիչ Խորեն Մեջլումյանը և առգրավում կատարելու որոշման հիման վրա փորձել է կատարել համապատասխան քննչական գործողություններ։ Քննիչն արգելել է դատավորի մասնակցությունը քննչական գործողությանը։ Այդ գործողությանը քննիչը մասնակից է դարձրել տվյալ դատարանի մեկ այլ աշխատակցի, առգրավել են դատավորի և նրա աշխատակազմում առկա համակարգիչները, որից հետո կնքել դատավորի աշխատասենյակի դուռը»,–ասաց նա։

Փաստաբանի խոսքով՝ դատավորի աշխատասենյակը կնքելը լուրջ իրավական հետևանքներ է առաջացրել.

«Առանց դատարանի որոշման կնքվել է դատավորի աշխատասենյակի դուռը, կնիքը ստուգելու նպատակով աշխատասենյակի դռան մոտ ոստիկան են կանգնեցրել, որը թույլ չի տվել դատավորին մտնել իր աշխատասենյակ և իրականացնել իր աշխատանքային գործունեությունը»։

Մելիքյանն ասաց, որ իրենք քննիչից պահանջել են դատարանի որոշումը, որը սակայն քննիչը չի ներկայացրել, ինչից հետո խուզորկություն է իրականացվել դատավորի աշխատասենյակում.

«Ոստիկանը պահանջել է դատավորից հեռանալ, մենք առարկել ենք, ներկայացրել ենք, որ աշխատասենյակի բանալին դատվորի մոտ է, և եթե օրենքի խախտմամբ պետք է խուզարկություն իրականացվի, ապա բանալին չեն տրամադրի։ Քննիչը կես ժամ հեռախոսով ինչ–որ մեկի հետ հարցը քննարկելուց հետո համաձայնեց, որ դատավորը ներկա գտնվի խուզարկության գործողությանը, սակայն փաստաբանին՝ ոչ։ Ընդ որում դատարանը թույլատրել է խուզարկություն իրականացնել դատավորի և նրա օգնականի աշխատասենյակում, սակայն քննիչը խուզարկություն է կատարել նաև գործավարի և նիստերի քարտուղարի աշխատասենյակում և ապօրինաբար այնտեղից կրիչներ առգրավել»,–հայտարարեց Մելիքյանը։

Փաստաբանը նշեց, որ իրենց խուզարկության հետ կապված դիմել են գլխավոր դատախազին՝ պահանջելով պարզաբանումներ տալ իրականացված գործողությունների վերաբերյալ։

Նշենք, որ փաստաբանը ոչ միայն վերաքննության կարգով բողոքարկել է խուզարկության որոշումը, այլև վիճարկել է խուզարկության, առգրավման գործողության ոչ իրավաչափությունը։ Բացի այդ փաստաբանը հաղորդում են ներկայացրել ոստիկանների և քննիչների դեմ՝ բնակարանի անձեռնմխելիության իրավունքը խախտելու վերաբերյալ։

Հիշեցնենք, քիչ առաջ Operativ լրատվականը հաղորդել էր, որ ընթանում է Ռուբեն Մելիքյանի, Սիրանուշ Սահակյանի և Դավիթ Գրիգորյանի փաստաբանի ասուլիսը: