Բիզնեսը չի արձագանքել նոր սերնդի ՀԴՄ-ների շուկայի ազատականացմանը. ՊԵԿ նախագահ
Դեռ մեկ ընկերություն կա, որը հայտարարել է, որ կունենա նոր սերնդի ՀԴՄ-ների որոշակի խմբաքանակ, բայց մենք կցանկանայինք, որ լիներ ոչ թե մեկը, այլ 11-101, իսկ գործընթացը լիներ ոչ թե հիմա, այլ 5-6 ամիս առաջ: Այդ մասին այսօր՝ հուլիսի 25-ին, լրագրողների հետ զրույցում ասաց ՊԵԿ նախագահ Դավիթ Անանյանը, հերքելով լուրերը, որ ՊԵԿ-ը ՀԴՄ սարքեր ներկրողների համար խոչընդոտներ է ստեղծել:
«ՊԵԿ-ը որևէ խոչընդոտ չի ստեղծել, եթե նման հայտարարություններ կան, ապա կխնդրեմ փաստեր ներկայացնել, այլապես մենք դա կհամարենք պարզ ու պրիմիտիվ հերյուրանք»,- ասաց նա, հիշեցնելով, որ ՀԴՄ-ները ՊԵԿ-ը չի ներկրում, այլ մրցույթ է հայտարարում:
Անանյանը նաև նշեց, որ մրցույթի հետ կապված որոշակի ճշգրտումներ դեռ պետք է լինեն, և իրենք պատասխանատու մարմնին հարցում են ուղարկել. «Ազնվորեն ասեմ, որ մենք հակված չենք ՀԴՄ-ների նոր խմբաքանակ ձեռք բերել: Մեր դիրքորոշումն այնպիսին է, որ եթե այս ընթացքում կլինեն գործարարներ, որոնք կլցնեն շուկան համապատասխան տեխնիկական հնարավորություն ունեցող ՀԴՄ-ներով, ապա կվերանայենք մեր դիրքորոշումը, բայց գնում կկատարենք այն ժամանակ, երբ բիզնեսը կարձագանքի մեր ազատականացման քաղաքականությանը: Մենք ազատականացրել ենք, բայց բիզնեսը չի արձագանքել: Մենք հիմա մոտ 10 հազար դիմումներ ունենք, որը չենք կարողանում բավարարել, քանի որ ունենք սահմանափակ քանակություն, որն էլ տրամադրում ենք սահմանամերձ շրջաններում գործունեություն ծավալողներին»:
Իսկ թե ինչ պետք է անեն կազմակերպությունները, որոնց ցանկանում են ՀԴՄ ունենալ, ՊԵԿ նախագահը ասաց, որ ՀԴՄ չունեցող կազմակերպությունը չի կարող գործունեություն ծավալել: Նրա խոսքով, ստեղծված իրավիճակն այնքան էլ լավ չէ, սակայն հույս ունի, որ ամեն բան կհաղթահարվի. «Մենք փակուղու առաջ չենք կանգնեցրել: Իրավիճակ է, որտեղ կա օրենսդրական պահանջ, որ պետք է ՀԴՄ- լինի, ինչպես նաև կար հանրային պահանջ, որ ՀԴՄ շուկան պետք է ազատականացվի»: