«Մասիվցի Անդիկի» սպանությունը պատվիրած է եղել. ունենք կատարող, պատվիրատու. Ավելին չասեմ. Օսիպյան

ՀՀ ոստիկանապետ Վալերի Օսիպյանը համաձայն չէ դիտարկմանը, թե ոստիկանությունը թեեւ պարբերաբար բերման է ենթարկում «օրենքով գողերին», բայց իրավիճակին չի տիրապետում՝ դատելով այն հանգամանքից, որ ՀՀ-ում օրենքով գող են սպանում, բայց որեւէ բացահայտում չի եղել:

«Անընդունելի է հայտարարությունը, թե ոստիկանությունը չի տիրապետում իրավիճակին: Ոստիկանությունը լիարժեք տիրապետում է իրավիճակին, բոլոր ժամանակներում էլ եւ բոլոր ոստիկանապետերի, բոլոր իշխանությունների ժամանակ էլ եղել են նման դեպքեր: Հանցագործությունն այնպիսի երեւույթ է, որ հնարավոր չէ հասարակությունից եւ մեր առօրյայից իսպառ վերանա»,- այսօր՝ հուլիսի 24-ին, լրագրողների հետ հանդիպման ժամանակ նշեց ՀՀ ոստիկանապետ Վալերի Օսիպյանը:

Ինչ վերաբերում է կոնկրետ «օրենքով գող» Մասիվցի Անդիկ մականունով հայտնի Անդրանիկ Հարությունյանի սպանությանը, Օսիպյանը նշեց. «Թույլ տվեք փակագծերը չբացեմ, բայց մենք հանրությանը կներկայացնենք այս դեպքի հետ կապված մեր բոլոր հաջողությունները, որոնք կունենանք: Մենք տիրապետում ենք իրավիճակին: Ոստիկանությունը լռում է՝ ելնելով իրավիճակից:

Այդ սպանությունը պատվիրած է եղել: Ունենք կատարող, պատվիրատու: Այսքանը: Մնացածը կներկայացվի»,-ընդգծեց Օսիպյանը: նա:

Նրա խոսքով, հանցագործություններ կան, որոնք բացահայտման համար ժամանակ են պահանջում. «Համեմատության համար նշեմ, որ երեկ մեկ բնակարանային գողության դեպք է բացահայտվել, որը կատարվել է 1997 թ-ին, 23 տարի առաջ եղել է, երեկ բացահայտել են»,-ասաց նա:

Հիշեցնենք, քիչ առաջ Operativ լրատվականը հաղորդել էր, որ Վալերի Օսիպյանը այսօր, հուլիսի 24-ին լայնածավալ ասոիւլիս է հրավիրել: Նա ներկայացրել է 2019-ի առաջին կիսամյակի արդյունքները:

Հիշեցման կարգով ասենք նաև, որ Անդրանիկ Հարությունյանը մահացու հրազենային վնասվածքներ է ստացել 2019 թվականի հուլիսի 2-ին՝ Նոր Նորքի 5-րդ զանգվածի շենքերից մեկի բակում: Հարությունյանի դիակի վրա առկա է 4 հրազենային վնասվածք, որոնցից մեկը՝ դեմքին։

«Հանցավոր աշխարհը վերահսկելի է ոստիկանության կողմից», - ասել էր Օսպիյանը  «օրենքով գող» Անդիկի սպանության փաստին անդրադառնալով:

Վերջերս Operativ լրատվականը, հղում կատարելով Shant.news լրատվականին, գրել էր նաև, որ Մասիվցի Անդիկի սպանության պատվիրատուները հայտնի են: