Հպարտ եմ, որ ես եղել եմ այդ պայքարող ուսանողներից մեկը

Operativ.am-ի զրույցը  Բրուսովի անվան պետական համալսարանի նախկին ուսանող,  «Բրուսովյան» շարժման ակտիվիստ, «Քաղաքացիական գիտակցություն» ՀԿ նախագահ Նարեկ Սամսոնյանի հետ:

Կնկարագրե՞ք համալսարանում տիրող մթնոլորտը:

-Համալսարանում տիրող մթնոլորտին տիրապետում եմ «ԱՈւՖ» ԵՊԼՀ ակումբից ստացվող ինֆորմացիայի  միջոցով, քանի որ համալսարանից դուրս մնալուց հետո, բուհ-ի ղեկավարությունը ապօրինաբար, կամ ընտրովի  կարգով կիրառելով համապատասխան կանոնադրական կետը, որը ըստ էության աբսուրդի թատրոնի ժանրից է, խոչընդոտել են իմ մուտքը բուհ-ի տարածք:

Այսպիսով, իմ ունեցած տեղեկություններով ԵՊԼՀ-ում տիրող իրավիճակը, մեղմ ասած, զարմանալի է: Նշանակված ռեկտորը իրեն արհամարված է զգում ուսանողության կողմից և ամեն պատեհ առիթը օգտագործում է` բուհ-ի ներսում ուսանողության և պրոֆեսորադասախոսական կազմի հետ իր հարաբերությունները շտկելու և այսպես ասած իրեն լեգիտիմացնելու համար:

Ընդհանրապես, արդեն անցնող ուսումնական կիսամյանկի ընթացքում բուհ-ում տեղի են ունենում այնպիսի կադրային տեղաշարժեր, որոնք մեղմ ասած մտորումների տեղիք են տալիս: Այն ուսանողները որոնք շարժման ժամանակ տարբեր ձևերով քծնում էին այս «կատակերգության» կազմկերպիչներին այսօր ներգրավվել են տարբեր ամբիոններում աշխատանքի:

Ավելի ամբողջական պատկեր ստանալու համար ավելացնեմ ևս մի «դարակազմիկ» իրադարձություն. պատկերացրեք մի մարդ, որը 2000-ից ավել ուսանողի կողմից հեռանալու պահանջ է ստացել, այսօր հանդիսանում է նույն ուսանողների բուհ-ի ռեկտորի խորհրդականը: Այսքանից հետո թերևս արժե չխոսել բուհ-ի ներսում տիրող իրավիճակից' ենթադրությունները թողնելով ընթերցողներին:

Փոփոխություններ կա՞ն լեզվաբանական համալսարանում Ս.Զոլյանի և ներկայիս ռեկտորի մեթոդների միջև:

Միակ տարբերությունը այն է, որ ներկայիս ռեկտորը նշանակված է, ոչ թե ընտրված, որից էլ բխում է մնացած բոլոր բացասական հետևանքները, որը ի դեպ բազմիցս արտահայտել են ներկայումս բուհ-ում սովորող ուսանողները: Ես անձամբ չեմ հասցրել տեսնել Նշանակված ռեկտորի գործելավոճը այդ իսկ պատճառով միայն առաջնորդվում եմ ուսանողների կարծիքներով:

Մեկ անգամ դուք Ձեր հարցազրույցներից մեկում ասել եք, որ եղել են ներքին կանոնադրական փոփոխություններ, իսկ կնշե՞ք, թե ինչպիսի փոփոխություններ կան ներկայիս ներքին կանոնադրության մեջ:

Անկեղծ ասած, ես չեմ կարծում, որ այսօր որևէ կանոնադրական փոփոխություն, կամ առհասարակ օրենք նշանակություն ունի այն մարդկանց համար, ովքեր այսօր զբաղված են ամենաթողությամբ հենց բու-ի ներսում: Մենք օրենքների փոփոխություններից տեղեկանում ենք, կամ վերջում, կամ ընդհանրապես չենք էլ տեղեկանում. օրինակ վերջերս մի քանի ուսանողներ դիմել էին բուհ-ի ղեկավարությանը և խնդրել էին տրամադրել բուհ-ի
կանոնադրությունը, որը ըստ էության պետք է առանց պահանջելու տրամադրվի բուհ-ի ղեկավարության կողմից, սակայն նույնիսկ պահանջելու դեպքում այդ մարդիկ տարբեր պատճառաբանություններով չեն կատարում ուսանողների օրինական պահանջը: Այսքանից հետո խոսել ինչ որ կանոնադրական կետի, կամ օրենքի մասին ինձ թվում է անիմաստ զբաղմունք է:

Արդեն մի քանի օր է նկատվում է Բրյուսովյան շարժման վերաակտիվություն, ինչպե՞ս կբացատրեք այդ և ինչի հետ է կապված ուսանողների ակտիվությունը:

Նմանատիպ ակտիվությունը կապված է ուսանողների շրջանում քաղաքացիական գիտակցության բարձրացման հետ: Մինչև Բրյուսովի հայտնի շարժումը, ուսանողական նմանատիպ ակտիվություն ընդհանրապես դաշտում գոյություն չուներ, սակայն, Բրյուսովի ուսանողների պայքարը ցույց տվեց, որ Հայաստանում գոյություն ունեն նաև իրենց իրավունքների համար պայքարելու պատրաստ ուսանողներ:

Բրյուսովի շարժման յուրահատկությունը նաև կայանում էր նրանում, որ շարժման ակտիվիստների գերակշիռ մասը կազմում էին իգական սեռի ներկայացուցիչներ, որոնք իրենց վճռականությամբ ապացուցեցին, որ գոյություն ունեցող կարծրատիպերի վերացումը ընդհամենը ժամանակի հարց է: Եվ ես հիմա շատ պատասխանատու հայտարարություն եմ ուզում անել կապված Բրյուսովի շարժման հետ. ես հպարտ եմ, որ նույն հարթակում կանգնած եմ եղել' Սեփական իրավունքների համար պայքարող ուսանողների կողքին և հպարտ եմ, որ ես եղել եմ այդ պայքարող ուսանողներից մեկը:

Մեր շարժումը աննախադեպ էր ՀՀ 3-րդ Հանրապետության պատմության մեջ և այսպես, թե այնպես դա մնալու է պատմության մեջ և հիշվելու է, որպես ուսանողական ամենաազնիվ և պայծառ շարժումներից մեկը: Իսկ Շարժման հետագա գործունեությունը Բրյուսովում, շարունակվելու է ավելի մեծ թափով եկող տարվա սկզբից:

Ինչպե՞ս կմեկնաբանեք Ցոլակ Ակոպյանի արած հայտարարությունը:

Ձեր կողմից նշված անձնավորության անուն ազգանունը ինձ ոչինչ չի ասում և մեկնաբանել ինչ որ մեկի կողմից արված ակնհայտ Անպատասխանատու արտահայտություն այն էլ առանց ճանաչելու նույնն է թե մեկնաբանել հաճախակի հանդիպող Ռուսաստանում «միլիոնների» կարողություններ ունեցած և «բախտի քմահաճույքով» տաքսու ղեկին հայտնված վարորդների դատողությունները, որոնց ես միշտ խորհուրդ եմ տալիս հետևել միայն ճանապարհին: 

Եվ կավելացնամ միայն մեկ բան՝ որտեղից և ինչպիսի հիմքեր կարող է ունենալ մի մարդ նման հայտարարություն անելու համար, երբ գրեթե ոչ մի կապ չունի Բրյուսովի հետ և եթե եղել է նաև «բարդակ» նա որտեղից է իմացել ներքին խոհանոցում տիրող մթնոլորտի մասին