Կաշառքի համար մեղադրվող դատավոր Հեբոյանի հաղորդման հիման վրա հարուցված քրգործը կարճվել է. նրան բռնությամբ դատարան տեղափոխելու ապացույցներ չկան
Կաշառք ստանալու համար մեղադրվող դատավոր Գագիկ Հեբոյանի հաղորդման հիման վրա հարուցված քրեական գործը կարճվել է հանցակազմի բացակայության հիմքով։ Այս մասին News.-am-ի հարցմանն ի պատասխան տեղեկացրեց Հատուկ քննչական ծառայության մամուլի խոսնակ Մարինա Օհանջանյանը։
Ավելի վաղ Հեբոյանը հանցագործության մասին հաղորդում էր ներկայացրել Հատուկ քննչական ծառայություն՝ իրեն բռնությամբ դատարան տեղափոխելու հետ կապված։ Հաղորդման հիման վրա հարուցվել էր քրեկան գործ ՀՀ ՔՕ 309–րդ հոդվածի 2–րդ մասի հատկանիշներով. այն է՝ բռնության գործադրմամբ պաշտոնեական լիազորությունները անցնելը։ Հեբոյանը գործով ճանաչվել էր տուժող։
Դատավորի խոսքով մայիսի 27-ի դատական նիստին իրեն բռնի ուժով են բերել դատարան և որոշում կայացրել կալանավորել։
Հիշեցնենք, որ Գագիկ Հեբոյանի վերաբերյալ մեկ այլ քրեական գործ այժմ դատարանում է։ Նա մեղադրվում է առանձնապես խոշոր չափերով կաշառք ստանալու համար՝ ՀՀ քրեական օրենսգրքի 311-րդ հոդվածի 4-րդ մասի 2-րդ և 3-րդ կետերով։ Հեբոյանի նկատմամբ որպես խափանման միջոց է ընտրված կալանավորումը։