Սևան քաղաքում ընթանում են լայնածավալ շինարարական աշխատանքներ
Սևան քաղաքն այս օրերին վերածվել է ակտիվ շինհրապարակի, ուր մի քանի ուղղություններով ընթանում են հիմնանորոգման և բարեկարգման աշխատանքներ:
Ինչպես «Արմենպրես»-ին տեղեկացրեց Սևանի քաղաքապետարանի աշխատակազմի քարտուղար Արմինե Ղուկասյանը, այս օրերին Սևանի Գագարին գյուղում իրականացվում են մշակույթի տան վերանորոգման աշխատանքներ:
Մշակույթի տան վերանորոգման աշխատանքներն իրականացվում են Հայաստանի տարածքային զարգացման հիմնադրամի, ՀՀ կառավարության կողմից առաջնահերթ լուծում պահանջող ծրագրերի շրջանակներում:
ՀՀ կառավարության կողմից հատկացվել է 18 միլիոն դրամ, իսկ շուրջ երեք միլիոն դրամ կազմել է Սևանի համայնքապետարանի համաֆինանսավորումը: Ծրագրի շրջանակում նախատեսված է մինչև տարեվերջ ավարտել Գագարինի մշակույթի տան ներքին հարդարման աշխատանքները:
Կառուցման մյուս հասցեն Չարենց փողոցի սկզբնամասն է: Չարենց-Շահումյան փողոցների խաչմերուկից մինչև Չարենց-Ելենովկա փողոցների խաչմերուկ ընկած հատվածը` 4824 քմ, շուտով ևս կդառնա ասֆալտապատ ու բարեկարգ և կամբողջացնի Չարենց փողոցի միաշերտ ասֆալտապատման ամբողջական պատկերը:
Ծրագիրն իրականացվում է «Չարենցի փողոցի ասֆալտապատում» սուբվենցիոն ծրագրի շրջանակում: Շինարարական աշխատանքները մեկնարկել են այս տարվա հունիսից և կավարտվեն օգոստոսի վերջերին: ՀՀ կառավարությունը հատկացրել է ծրագրի ընդհանուր արժեքի 60, Սևանի համայնքապետարանը՝ 40 տոկոսը: Այս օրերին բարեկարգման աշխատանքներ են ընթանում Սևանի կենտրոնական տարածքներից մեկում. նորոգվում է Գործարանային փողոցի թիվ 2 շենքի արևմտյան հասցեում գտնվող անցուղին: Ծրագիրն իրականացվում է «Վարձատրվող հասարակական աշխատանքների կազմակերպման միջոցով գործազուրկների ժամանակավոր զբաղվածության ապահովում» ծրագրի, ինչպես նաև «Վարձատրվող հասարակական աշխատանքների իրականացում» երկկողմ` Սևանի համայնքապետարանի և Սևանի զբաղվածության կենտրոնի միջև ստորագրված պայմանագրի շրջանակներում: Օրեր անց քաղաքի այս հատվածն էլ բնակիչների և քաղաքի հյուրերի համար կդառնա երթևեկության հարմարավետ և անվտանգ տարածքներից մեկը: Բարեկարգման մյուս հասցեն 2-րդ միկրոթաղամասի միջանցիկ հատվածն է, որը տասնամյակներ շարունակ մեծ անհարմարություն էր պատճառում միկրոթաղամասի բնակիչներին և այդտեղով անցուդարձ անող մարդկանց՝ միաժամանակ ստեղծելով ավտոմեքենաների երթևեկի համար ոչ բարենպաստ իրավիճակ:
Համայնքային միջոցներով այստեղ կատարվում է ասֆալտբետոնյա միաշերտ ծածկի տեղադրում՝ 115 գծամետր երկարությամբ և շուրջ 750 քմ մակերեսով: Աշխատանքներն այստեղ արդեն մոտենում են ավարտին: Բարեկարգման մյուս հասցեն Գործարանային փողոցն է, որը ևս դարձել էր անհարմարավետ և ոչ բարեկարգ:
Խնդրին լուծում տալու նպատակով համայնքապետարանի կողմից այս օրերին փողոցում իրականացվում են բարեկարգման աշխատանքներ, հարթեցվում է տարածքը, որը հնարավորություն կտա ամռան այս ամիսներին և հետագայում ևս քաղաքի բանուկ հատվածում գտնվող Գործարանային փողոցն օգտագործել լիարժեք»,-ընդգծեց Արմինե Ղուկասյանը:
Խոսրով Խլղաթյան