Նշվեց հանքագործի ու մետաղագործի մասնագիտական տոնը

Ամեն տարվա հուլիսի 3-րդ կիրակի օրը Հայաստանի Հանրապետությունում հանքարդյունաբերություն ծավալած «Գեոպրոմայնինգ» ընկերությունը նշում է հանքագործի եւ մետաղագործի մասնագիտական տոնը:

«Արմենպրես»-ի տեղեկացմամբ՝ այս տարի տոնի մեկնարկը տրվեց Արարատ քաղաքում: Տոնակատարությանը մասնակցեցին Գեղարքունիքի մարզպետ Գնել Սանոսյանը, Արարատի մարզպետ Գարիկ Սարգսյանը, «Գեոպրոմայնինգ» ընկերությունների խմբի նախագահ Ռոման Խուդոլին, ընկերության աշխատակիցներ, գործընկերներ:
«Տրամադրությունը հրաշալի է: Շատ երկրներում, հարյուր հազարավոր, գուցե նույնիսկ միլիոնավոր մարդիկ նշում են այս տոնը: Չկա արդյունաբերության ճյուղ, որտեղ չօգտագործվիմետաղագործի արտադրանքը: Պատահական չէ, որ ասում են՝ արդյունաբերության հացը մետաղագործությունն է: Դա հենց այդպես է, եւ ոչինչ չի փոխվել արդեն հարյուր տարի: Մենք ամեն տարի գրանցում ենք մեծ եւ լուրջ արդյունքներ եւ հպարտ ենք, որ ունենք այսպիսի կոլեկտիվ»,-բացման խոսքում նշեց Ռոման Խուդոլին:

Ինչպես իրենց ելույթներում նշեցին Գեղարքունիքի եւ Արարատի մարզպետները, «Գեոպրոմայնինգ» ընկերության շնորհիվ Հայաստանում տարեցտարի կայունանում է տնտեսությունը, սոցիալական ոլորտում կյանքի են կոչվում նկատելի ծրագրեր: «Պետք է նշեմ, որ մեր համագործակցությունը «Գեոպրոմայնինգ»-ի հետ հաջող ընթացք ունի: Այս տարի ընկերության միջոցներով Վարդենիս քաղաքի թիվ 2, 3,4 հիմնական դպրոցներում կկառուցվեն ջեռուցման համակարգեր, որից հետո հիշյալ հաստատությունները կջեռուցվեն գազով: Սա շատ կարեւոր ծրագիր է Վարդենիս քաղաքի համար, քանի որ մինչ այժմ այդ դպրոցները ջեռուցվել են նավթով կամ փայտով՝ չապահովելով լիարժեք ջեռուցում: Ունենք նաեւ պայմանավորվածություն այլ ոլորտներում նոր ծրագրերի իրականացման շուրջ»,-նշեց Գեղարքունիքի մարզպետ Գնել Սանոսյանը:

Ընկերությունների խմբի նախագահը լավագույն աշխատակիցներին եւ աշխատանքի վետերաններին հանձնեց շնորհակալական պատվոգրեր, դրամական պարգեւներ, հանքագործի եւ մետաղագործի շքանշաններ:

Միջոցառման ընթացքում կայացավ «Ընդերքի լեզուն հասկացողները» ֆիլմի պրեմիերան՝ նվիրված օրվա հերոսներին՝ հանքագործներին եւ մետաղագործներին, ինչպես նաեւ ներկայացվեց ռեպորտաժ-հաշվետվություն վերջին 5 տարում մեր երկրում ընկերության իրականացրած սոցիալական ծրագրերի վերաբերյալ:

Էստրադայի , հեռուստաշոուների հանրահայտ աստղերի, տեղի շնորհալի սաների մասնակցությամբ կայացած համերգը Արարատում օրն առավել տոնական դարձրեց: Հաջորդ օրը Վարդենիսի կենտրոնական պուրակում տոնական տրամադրությունը համակել էր հարյուրավոր մարդկանց, դպրոցականներին ու մանուկներին: Երեկոն ուղեկցվեց խրախուսման արարողությամբ: Ընկերության աշխատակիցներն արժանացան դրամական պարգևների, շքանշանների եւ կոչումների:

Հանդիսավարի ներկայացմամբ՝ Սոթքի ոսկու հանքավայրի եւ Արարատի ոսկու կորզման գործարանի ֆուտբոլային թիմերի միջեւ օրերս կայացած հանդիպումն ավարտվել է վարդենիսցիների հաղթանակով :

«Գեոպրոմայնինգ» ընկերության փոխտնօրենը, շնորհավորելով թիմին, հայտարարեց, որ իրենք կդառնան Վարդենիսի ֆուտբոլի հավաքականի գլխավոր հովանավորը, եւ դա հնարավորություն կտա թիմին՝ մասնակցելու այս տարի Արցախում կայանալիք համահայկական խաղերին:
«Ուզում եմ ողջունել բոլորին: Երախտագիտությունս եմ հայտնում «Գեոպրոմայնինգ» ընկերությանը՝ համահայկական օլիմպիական խաղերում մեր թիմին հովանավորելու եւ այն ամենի համար, ինչ դուք անում ենք Վարդենիսի համար: 8 ամիս է, ինչ պաշտոնավարում եմ ու ամեն քայլափոխին զգում եմ քաղաքի նկատմամբ ձեր ուշադրությունն ու աջակցությունը»,-ասաց Վարդենիսի քաղաքապետ Արամ Մելքոնյանը:

Տոնական միջոցառումը եզրափակվեց շքեղ հրավառությամբ:

Խոսրով Խլղաթյան