Փախստականի կարգավիճակն ու ապաստանը ձրի առողջապահական ծառայություններ ստանալու միջոց չէ. Միգրացիոն ծառայության պետ
«2015-2016 թվականների միգրացիոն ճգնաժամով պայմանավորված՝ եվրոպական երկրները խստացրեցին իրենց միգրացիոն քաղաքականությունը, և անօրինական հիմքերով ԵՄ անդամ երկրների տարածքներում գտնվող անձանց գործերն ավելի արագ են քննվում և որոշումներ են կայացվում հիմնականում բացասական ելքով»,-«Առաջին լրատվական»-ի հետ զրույցում ասել է Միգրացիոն ծառայության պետ Արմեն Ղազարյանը՝ հավելելով, որ վերջին շրջանում եվրոպական երկրներից ՀՀ քաղաքացիների արտաքսումը պայմանավորված է նաև Հայաստանում տեղի ունեցած քաղաքական փոփոխություններով, և Հայաստանը քաղաքական հետապնդումների առումով համարվում է ապահով երկիր։
Ղազարյանը նշել է, որ Հայաստան վերադարձողները մի շարք խնդիրների են բախվում, քանի որ նրանք հիմնականում հեռանալիս բնակարաններ են վաճառում և հեռանում։
Միգրացիոն ծառայության ղեկավարի խոսքով՝ ստեղծված իրավիճակի պատճառն այն է, որ մեր քաղաքացիների պատկերացմամբ՝ եվրոպական երկրներում ապաստանի ու փախստականի կարգավիճակը անվճար առողջապահությունից օգտվելու հնարավորություն է, ինչն այդպես չէ։ Փախստականի կարգավիճակ և ապաստան տրամադրվում է այն անձանց, ովքեր հետապնդման ռիսկի տակ են: «Վերադարձողների մասով պետությունը նախկինում ոչինչ չէր անում, զուտ համակարգողի ֆունկցիա էր իրականացնում։ Հիմա մենք ծրագրեր ենք իրականացնում, որոնց մասին այս պահին ոչինչ ասել չեմ կարող»,- ասել է Ղազարյանը։