Ոստիկանությունը նոր մանրամասներ է հայտնել այսօր՝ հուլիսի 19-ի գիշերը Նոր Արեշի տներից մեկում տեղի ունեցած ողբերգական դեպքից
Ոստիկանությունը նոր մանրամասներ է հայտնել այսօր՝ հուլիսի 19-ի գիշերը Նոր Արեշի տներից մեկում տեղի ունեցած ողբերգական դեպքից:
Հուլիսի 19-ին, ժամը 03.30-ի սահմաններում, ԱԻՆ «911» ծառայություն է զանգահարել Նոր Արեշի 16-րդ փողոցի մի բնակիչ և հայտնել, թե տղան հոգեկան հիվանդ է, դանակը վերցրել և մտել է սենյակ, վախենում է, որ իրեն կվնասի:
Ոստիկանությունից հայտնում են, որ ավելի ուշ «Էրեբունի» բժշկական կենտրոնից հաղորդում է ստացվել, որ «կրծքավանդակի կտրած-ծակած վերքեր» ախտորոշմամբ շտապօգնության խումբը բուժօգնության է տեղափոխել Նոր Արեշի 16-րդ փողոցի բնակիչ, 59-ամյա մի տղամարդու: Նա հայտնել է, որ տանը տեղի է ունեցել դանակահարություն:
Եվս հինգ րոպե անց նույն բժշկական կենտրոնից նոր հաղորդում է ստացվել. «կրծքավանդակի կտրած-ծակած վերքեր» ախտորոշմամբ, նույն հասցեից, իրենց մոտ է տեղափոխվել 61-ամյա կնոջ դիակ:
Ոստիկանության Էրեբունու բաժնից մեկնած օպերատիվ խումբը պարզել է, որ տղան խոհանոցային դանակով հարվածել և մարմնական վնասվածքներ է պատճառել մորն ու հորը, հետո վնասել է ինքն իրեն և դիմել փախուստի: Ոստիկաններին հաջողվել է դեպքի վայրին հարակից տարածքում հայտնաբերել տղային և ժամը 04.55-ին նրան տեղափոխել հիվանդանոց, որտեղ ախտորոշվել է «պարանոցի կտրած-ծակած վերքեր»:
Դեպքի վայրի զննությանբ հայտնաբերվել և վերցվել է հանցագործության գործիք դանակը:
Նշանակվել են դատաբժշկական փորձաքննություններ, կատարվում է նախաքննություն:
Հիշեցնենք, ավելի վաղ Operativ լրատվականը, հղում կատարելով Shamshyan.com-ին, հայտնել էր, որ ողբերգական դեպք է տեղի ունեցել Երևանում. 27-ամյա տղան սպանել է մորը, դանակի հարվածներ հասցրել հորն ու ինքնավնասել իրեն. Էրեբունու ոստիկանները տաք հետքերով հայտնաբերել են մայրասպանին: