Հեղափոխությունը լրիվ հերիք է. Մոսկվան ուզում է, որ ոչ ոք, այդ թվում՝ Երևանը, չխառնվի Արցախի ընտրություններին

2020 թվականին Արցախում կայանալիք նախագահական ընտրությունները, քարոզարշավը դեռ չմեկնարկած, արժանացել են տեղական և միջազգային փորձագետների, հասարակական-քաղաքական շրջանակների ուշադրությանը։ Իհարկե առայժմ խոսվում է մի քանի թեկնածուների մասին, դեռ հայտնի չէ, թե վերջնական պատկերն ինչպիսին կլինի, արդյոք ընտրություններին մասնակցելու հնարավորություն կունենա՞ ՊԲ նախկին հրամանատար Սամվել Բաբայանը։

Երևանի դիրքավորումն առայժմ չեզոք է, չկա կոնկրետ թեկնածու, որին վարչապետ Փաշինյանը ուղղակի կամ անուղղակի կերպով սատարում է։ Փոխարենը՝ կալանավորումից առաջ իր հետաքրքրությունների մասին խոսեց Ռոբերտ Քոչարյանը՝ հայտարարելով, որ Արցախում ունի նախընտրած թեկնածու։

Ռուսաստանցի քաղաքագետ Ստանիսլավ Տարասովը «Առաջին լրատվական»-ի հետ զրույցում խոսեց Մոսկվայի դիրքորոշման մասին։ Տարասովը մասնավորապես նշեց. «Մոսկվան ակնկալում է, որ Ղարաբաղի ժողովուրդը ինքը ընտրի իր արժանի ներկայացուցչին, և որ դրան ոչ ոք չմիջամտի, այդ թվում՝ Երևանը։ Ղարաբաղի ժողովուրդը շատ արժանիքներ ունի, մեծ փորձությունների միջով է անցել, քաղաքականապես կիրթ է, ու պետք չէ կողքից հուշել, թե ինչպես գործեն։ Ահա այս ամենն է հետաքրքրում Մոսկվային և նաև, որպեսզի պահպանվի կայունությունը»։

Շարունակելով՝ մեր զրուցակիցը նշեց՝ Ղարաբաղի իշխանությունները՝ Բակո Սահակյանի գլխավորությամբ, դրական շատ բան են արել, Ղարաբաղը հրաշալի տեսք ունի. «Ես վերջերս եղել եմ գործուղման Սուխումում։ Դուք գիտեք, որ այն անկախ պետություն է՝ ճանաչված Ռուսաստանի կողմից, բայց Ղարաբաղը, լինելով չճանաչված պետություն, ավելի ինտենսիվ է զարգանում, քան Աբխազիան։ Պետք է նշեմ, որ Ղարաբաղի հայերը իրենց գնահատում են, աշխատասեր են, ու դա միայն հիացմունք է առաջացնում»։

Մեր այն դիտարկմանը, թե նախկինում Երևանը մշտապես միջամտել է Ղարաբաղի ընտրություններին, ունեցել է իր թեկնածուն, Տարասովն արձագանքեց. «Հիմա անձամբ Փաշինյանն է ասում՝ Ղարաբաղն առանձին է, Երևանը՝ առանձին, Ղարաբաղը հակամարտության կողմ է։ Դա ինքն է ասում, մենք չենք ասում։

Իր խոսքերն են, չէ՞, որ Ղարաբաղի ժողովուրդն իրեն չի ընտրել, ու ինքն իրավունք չունի խոսելու այդ ժողովրդի անունից։ Մենք հարգում ենք հայկական կողմի դիրքորոշումը, և ուրեմն Ղարաբաղի ժողովուրդը ինքը պետք է իր ճակատագիրը որոշի։ Պետք չէ այնտեղ որևէ հեղափոխություն նախաձեռնել, հայկական հեղափոխությունը լրիվ հերիք է, և մենք դեռ չգիտենք, թե այն ինչով կավարտվի»։

Նյութն ամբողջապես՝ սկզբնաղբյուրում: