«Պարտադիր չի, որ պաշտոնյան լինի փորով, քաչալ, կոռումպացված». Տաթևիկ Ռևազյանը՝ «Սիրուն աղջիկ» արտահայտության մասին
Երբ պատգամավորը լայվ է մտնում, լավ կլիներ մինչև մտնելը զանգեր մեզ, որովհետև իր լայվ մտնելու պահին մենք հարցեր էինք լուծում: Այս մասին, այսօր՝ հուլիսի 15-ին, լրագրողների հետ հանդիպման ժամանակ նշեց Քաղաքացիական ավիացիայի կոմիտեի նախագահ Տաթևիկ Ռևազյանը՝ անդրադառնալով «Լուսավոր Հայաստան» խմբակցության ղեկավար Էդմոն Մարուքյանին, ով խոսելով ավիացիայի խնդիրների մասին իրեն հեգնանքով «սիրուն աղջիկ» էր անվանել:
Դիտարկմանը, որ միգուցե իրեն «սիրուն աղջիկ» են անվանել, որովհետև իր կատարած սիրուն աշխատանքն այդքան էլ չի երևում, Ռևազյանն արձագանքեց. «Եկեք այդ «սիրուն աղջիկ» բառը չօգտագործենք ու հարգենք մարդկանց: Պետք չի որևէ մեկի խոսքով ներկայացնել: Այստեղ պրոֆեսիոնալիզմը պետք է բարձր մակարդակի պահպանել: Դուք «սիրուն աղջիկ» արտահայտությանը հղում անելով պրոֆեսիոնալիզմը չեք պահպանում»:
Հարցին, թե նեղսրտե՞լ է այդ արտահայտությունից, Քաղավիացիայի կոմիտեի նախագահը պատասխանեց. «Ես իրականում ուրախացել եմ, որ այդպիսի բան է եղել, որովհետև դա ԱԺ-ում լուրջ քննարկման առիթ դարձավ և ես հույս ունեմ, որ դա լուրջ փոփոխություններ կբերի, որ ապագայում կին պաշտոնյաները նույն խնդիրների առջև չկանգնեն:
Ես չեմ վիրավորվել, մի քիչ ծիծաղել եմ, քանի որ «Արմքոմեդի»-ում էլ էին հետաքրքիր բան պատրաստել: Մենակ կարևոր է, որ Հայաստանում մտածելակերպի փոփոխություններ լինեն: Պետք է ընդունել, որ պարտադիր չի, որ պաշտոնյան լինի մեծահասակ, փորով, քաչալ, կոռումպացված: Եկեք մի քիչ սկսենք սովորել նոր կերպարին: Ես ոչ մի չափանիշի չէի համապատասխանում մինչև քաղավիացիա ընդունվելը, ու շատ դժվար են շատերը դա ընդունում:
Մեծ տարբերություն եմ զգում Հայաստանում և դրսում քննարկումների միջև: Երբ դրսում տարբեր միջազգային կազմակերպությունների հետ շփվում եմ, լրիվ հակառակ արձագանք ունեմ իրենցից»,- ասաց Ռևազյանը:
«Չէի ասի, որ իմ աշխատանքը չի երևում, կամ արդյունք չի բերում: Ես կոնկրետ արդյունքներ բերել եմ, այդտեղ կասկած չկա. այն, որ երկու լոուքոսթերներ պատրաստ են հաջորդ տարի մուտք գործել հայկական շուկա, շատ մեծ արդյունք է: Պատճառն այն է, որ ես ճկուն եմ աշխատել, ես չեմ գնացել ասել՝ Հայաստանի պայմանը սա է, ուզում եք՝ ընդունեք, չեք ուզում՝ մի ընդունեք: Ես տարբեր հարցեր եմ տվել, հասկացել եմ իրենց մտածելակերպը, տարբեր մասնագետների հետ եմ խոսել, որ հասկանամ, թե ինչ խնդիրներ են առաջացել, երբ իրենց մոտ մուտք են գործել տվյալ ընկերությունները, որ նույն խնդիրները չլինեն ՀՀ-ում»,- խոսելով իր գործունեության չերևալու վերաբերյալ լուրերից՝ շեշտեց Ռևազյանը:
Նա նկատեց, որ օրինակ, երբ լոուքոսթերները մուտք են գործում շուկա, շատ արագ մոնոպոլիստ են դառնում. «Մեկ տարի թռիչքներ են իրականացնում, հետո գալիս կառավարությանն ասում են՝ եթե էս-էս բաները մեզ համար չանեք, մենք դուրս կգանք շուկայից: Մենք հաշվի ենք առել այս հանգամանքը, դրա համար զեղչը տալիս ենք ոչ թե ավիաընկերությանը, այլ տալիս ենք ուղղության համար: Օրինակ, եթե մենք չունենք Երևան-Մարսել չվերթ, մենք ուզում ենք 5 տարով հանել օդի փողը: Այսինքն ուզում ենք այնպես անել, որ մեկը չկարողանա մտնի շուկա 10 ուղղություն բացի և մոնոպոլիստ դառնա»:
Հիշեցնենք, ավելի վաղ Operativ լրատվականը հաղորդել էր, որ լրագրողների հետ հանդիպման ժամանակ Տաթևիկ Ռևազյանը հատկանշական էր համարել, որ Հայաստանում գրեթե բոլոր ուղղություններով չվերթները շատացել են. նոր ուղղություններ են բացել :
Բացի այդ նա խոսել էր նաև այն մասին, թե ինչի է հանգեցրել իր՝ շատ ճամփորդելը:
Operativ լրատվականը ուղիղ հեռարձակմամբ հաղորդում էր նաև Տաթևիկ Ռևազյանի մամուլի ասուլիսը, որի ընթացքում նա ամփոփում էր պաշտոնավարման մեկ տարին: