«Իմ քայլը» դաշինքի խորհրդարանական խմբակցությունում ոչ մի առանձին հոսանքներ չեն ձևավորվում. Մակունցը ծավալուն պատասխանել է լրագրողների հարցերին (Տեսանյութ)

«Իմ քայլը» դաշինքի խորհրդարանական խմբակցությունում ոչ մի առանձին հոսանքներ չեն ձևավորվում: Հուլիսի 12-ին ԱԺ-ում իշխող «Իմ քայլը» դաշինքի պատգամավորների համատեղ մամուլի ասուլիսի ժամանակ այս մասին ասաց խմբակցության ղեկավար Լիլիթ Մակունցը:

Ընդ որում՝ Մակունցը նշեց, որ որպես խմբակցության ղեկավար, չի կարող հայտարարել խորհրդարանական խմբակցություններից մեկնումեկի հետ դաշինքի ձևաչափով համագործակցելու որևէ մտադրության մասին: «Կարծում եմ, որ «Իմ քայլը» դաշինքում ամեն ինչ բավականաչափ ներդաշնակ է, և այդ ներդաշնակությունը դրսևորվում է այդ թվում նաև մեր համագործակցության մթնոլորտում»,- պարզաբանեց Լիլիթ Մակունցը:

Ինչ վերաբերում է Ստամբուլյան կոնվենցիային, այն դեռեւս շրջանառության մեջ դրված չէ և այն անգամ պաշտոնապես քննարկման առարկա չէ կառավարությունում. Նշում է «Իմ քայլը» խմբակցության ղեկավարը: Նրա խոսքով, Կոնվենցիայի մասին հրապարակումներ կան, այն հանրային է, բայց շրջանառության մեջ դրված չէ:

Մակունցը հերքում է լրագրողների կողմից առաջ քաշված տեսակետը, թե «Իմ քայլի» պատգամավորների նկատմամբ ճնշումներ կան, որ այդ կոնվենցիայի մասին տեսակետ չհայտնեն.

«Նման բան չկա և չի կարող լինել: Այն պարագայում, երբ խմբակցության ներսում չի եղել քննարկում Ստամբուլյան կոնվերցիայի առնչությամբ, չի կարող լինել խմբակցության դիրքորոշում: Ինչ վերաբերում է դիրքորոշում հայտնելուն, ապա առանձին պատգամավորներ ձեր հարցապնդումների շրջանակներում ներկայացնում են իրենց դիրքորոշումները տվյալ փաստաթղթի վերաբերյալ: Այս առումով բավականին ակտիվ են «Իմ քայլը» խմբակցության պատգամավորները: Այնպես որ որևէ ճնշման մասին խոսք լինել չի կարող»,- ասաց Մակունցը՝ հավելելով, որ իրենք պատաստվում են խորքային ու մանրամասն քննարկում ծավալել այդ հարցով:

Բարձագույն դատական խորհուրդը, որը պատասխանատու է լինելու վեթինգի գործընթացի համար, առաջինը հենց իրենք պետք է անցնեն վեթինգ՝ անկախ նրանից ում կողմից են առաջադրվել, երբ են առաջադրվել: Այսպես էլ արտահայտվեց «Իմ քայլը» խմբակցության ղեկավար Լիլիթ Մակունցը՝ պատասխանելով այն հարցին, թե ինչպես են գնահատում երեկ տեղի ունեցած ԲԴԽ անդամների ընտրությունը և արդյոք այդ կազմով հնարավո՞ր է իրականացնել արդյունավետ ու անաչառ վեթինգ։

«Ի վերջո, այն կազմը, որ կունենանք՝ պրոցեսը սկսելուց առաջ իրենք կանցնեն այդ գործընթացը»,-ասաց նա:

Ինչ վերաբերում է ԲԴԽ նոր անդամներին, Մակունցը նշեց, որ չի կարող դատել, որովհետև իրավաբան չէ. «Բայց այն տարակուսանքը, որ մենք երեկ և այսօր տեսնում ենք մամուլում, քաղաքացիական հասարակության, առանձին գործիչների կողմից, ինձ համար իսկապես մտահոգիչ է»:

Հարցին, թե ԲԴԽ անդամների՛ վեթինգն ով պետք է իրականացնի, ԱԺ Պետաիրավական հանձնաժողովի նախագահ Վլադիմիր Վարդանյանը նշեց. «Դատավորի բարեվարքության ստուգումը, որը մենք անվանում ենք վեթինգը, դա պերմանենտ գործընթաց է, որը պետք է իրականացվի բոլոր պետական ծառայության մեջ գտնվող պաշտոնյաների նկատմամբ։ Այո, կա հնարավորություն, հատկապես բարձրագույն դատական ատյանների պարագայում, որ այդ վեթինգի գործընթացում հենց այդ մարմինը նախատեսի գործընթաց և այդ մարմինը շարունակի ընթանալ ինքնամաքրման ճանապարհով և սա եզակի դեպք չէ»:

Ինչ վերաբերում է ԲԴԽ ձևավորմանը և երեկ կայացած ընտրություններին, Վարդանյանն ասաց, որ ԲԴԽ-ն այն եզակի մարմինն է, որը ձևավորվում է երկու կառույցների կողմից՝ ԱԺ-ի և Դատավորների ընդհանուր ժողովի։

«ԱԺ-ում մենք փորձել ենք այնպիսի թեկնածուներ ներկայացնել, որոնք վայելում են ոչ միայն «Իմ քայլի», այլև բոլոր խորհրդարանական ուժերի աջակցությունը։ Մենք իրավունք չունենք որևիցե եղանակով ներխուժել դատավորների ընդհանուր ժողովի հարցերի մեջ, որովհետեւ դա կդիտարկվի որպես սահմանադրական մի շարք նորմերի խախտում: Ինչ վերաբերում է երեկվա ընտրությանը, չեմ կարող անդրադառնալ ընտրված դատավորներին, որովհետեւ եթե օրենքով սահմանված կարգով է իրականցվել՝ պետք է հարգել այդ ընտրությունը: Բայց առնվազն ինձ համար զարմանալի է՝ մեկ տարի անց այդ երդմնակալության արարողությունը կազմակերպելը, այն պարագայում, երբ կարծես տիկին Տավարացյանը նախկինում ներկայացրել էր հրաժարականի դիմում և այդ դիմումը մնացել է անհետևանք։ Սա որոշակի առումով անհասկանալի է եւ գուցե բավական լավ նյութ է իրավաբանական հետազոտություններ իրականացնելու համար»։

Հիշեցնենք, ավելի վաղ Operativ լրատվականը ուղիղ հեռարձակմամբ հաղորդել էր, որ այսօր՝ հուլիսի 12-ին «Իմ քայլը» դաշինքի պատգամավորները համատեղ մամուլի ասուլիս են հրավիրել և մանրակրկիտ պատասխանել լրագրողների բազմաթիվ հարցերի: