Նոր ՋԷԿ-ի կառուցման արդյունքում էլեկտրաէներգիայի սակագինը կնվազի. Գարեգին Բաղրամյան (Տեսանյութ)
Երևանում նոր 250 Մվտ հզորությամբ էլեկտրակայանի կառուցումը հնարավորություն կտա մոտ 1-1,5 դրամով նվազեցնել էլեկտրաէներգիայի սակգինը միայն այդ գործոնով պայմանավորված: Այս մասին, այսօր՝ հուլիսի 12-ին, Երևան ՋԷԿ-ի հարևանությամբ նոր 250 Մվտ հզորությամբ էլեկտրակայանի կառուցման շինարարության մեկնարկի միջոցառման ժամանակ լրագրողների հետ զրույցում նշեց Հանրային ծառայությունները կարգավորող հանձնաժողովի նախագահ Գարեգին Բաղրամյանը:
Նրա խոսքով, նոր կայանը գալու է փոխարինելու Հրազդանի ՋԷԿ-ին, որն արդեն հին կայան է և որի օգտակար գործողության գործակցիցը ցածր է: «Այդ կայանին 1-2 տարվա ռեսուրս է մնացել: Այսինքն նոր կայանը գալիս է հնին փոխարինելու: Սա կառուցվելուց հետո հինը շահագործումից կհանվի:
«Հրազդանի ՋԷԿ»-ը հոսանք արտադրում է գրաֆիկի պիկերը ծածկելու ժամանակ, երբ չի բավարարում ընդհանուր էլեկտրաէներգիան: Արտադրում է բավականին թանկ սակագնով: Միայն վառելիքային բաղադրիչը 31,5 դրամ է, որն արդեն 4 դրամ ավելի է: բացի վառելիքային բաղադրիչից ևս 10 դրամ ունի իր ծախսերի ապահովման համար: Այսինքն հին ՋԷԿ-ի սակագինը 40-41 դրամի է հասնում:
Այս նոր ՋԷԿ-ը էլեկտրաէներգիայի սակագնի վրա շուրջ 4 դրամ ավելի էժան է լինելու, եթե ընդհանուր սպառողների վրա տարածենք, 1-1,5 դրամ սակագնի նվազեցում կբերի»,-ասաց Բաղրամյանը:
Նա ընդգծեց, որ նոր կայանը շուրջ 4 տոկոսով ավելի բարձր ՕԳԳ ունի, որը նշանակում է, որ մեկ կվտ էլեկտրաէներգիա արտադրելու համար ավելի քիչ վառելիք է ծախսում և բնականաբար ավելի էժան էլեկտրաէներգիա է ստացվում:
Մանրամասն՝ տեսանյութում: