Ոստիկանության հոսպիտալի համար երկու նոր անզգայացման-վերակենդանացման սարք ձեռք կբերվի
Կառավարությունն իր այսօրվա՝ հուլիսի 11-ի նիստում որոշում կայացրեց 3,4 մլն դրամ հատկացնել: Ըստ այդմ, ՀՀ ոստիկանության բժշկական վարչության հոսպիտալի վիրաբուժական բաժանմունքի համար ձեռք կբերվի 2 անզգայացման-վերակենդանացման սարք, միավորը 5.1 մլն. դրամ գնով:
Այդ նպատակով Հոսպիտալի արտաբյուջետային միջոցների տարեկան 10.0 մլն. դրամ ծախսերը, ի հաշիվ տարեսկզբի մնացորդի, նախտեսվում է ավելացնել՝ 3.4 մլն. դրամով, սահմանելով՝ 13.4 մլն. դրամ:
Բացի այդ առաջարկվում է «Պարգևատրումներ, դրամական խրախուսումներ և հատուկ վճարներ» հոդվածը նվազեցնել 0.9 մլն. դրամի չափով, «Շենքերի և կառույցների ընթացիկ նորոգում և պահպանում» հոդվածը՝ 3.2 մլն. դրամի չափով և տարեսկզբի՝ 3.4 մլն. դրամ մնացորդի հետ միասին ավելացնել «Վարչական սարքավորումներ» հոդվածով նախատեսված 2.7 մլն. դրամ հատկացումները, այն սահմանելով 10.2 մլն. դրամ:
Այս որոշման ննհրաժեշտությունը` պայմանավորված է ՀՀ ոստիկանության բժշկական վարչության հոսպիտալի վիրաբուժական բաժանմունքի բնականոն գործունեությունն ապահովելու հանգամանքով:
Որոշման հիմնավորման մեջ նշվում է, որ հոսպիտալի արտաբյուջետային միջոցների գծով ծախսերը կազմում են 10.0 մլն. դրամ, որից 7.3 մլն. դրամը, 73%-ը նախատեսվել է ընթացիկ, իսկ 2.7 մլն. դրամը, 27 %-ը՝ ոչ ֆինանսական ակտիվների ձեռք բերման ծախսերի գծով: Նշված միջոցների տարեսկզբի մնացորդը 3.4 մլն. դրամ է:
Հոսպիտալի վիրաբուժական բաժանմունքի 5 միավոր անզգայացման- վերակենդանացման սարքերը շահագործվում են դեռևս 90-ական թվականներից և թե ֆիզիկական մաշվածության և թե ֆունկցիոնալ հնացության պատճառով գործնականում սպառել են գործածության ժամկետներն ու ռեսուրսը: Շահագործվում են խափանումներով՝ պարբերաբար ենթարկվելով նորոգումների, դրանով խաթարելով Հոսպիտալի բնականոն գործունեությունը:
Ընթացիկ տարվա վերը նշված ծրագրով սահմանված ծախսերի նախահաշվով նախատեսվել է ձեռք բերել 1 միավոր անզգայացման-վերակենդանացման սարք՝ 2 660.0 հազ. դրամ գնով: Սակայն ինչպես հետագայում պարզվեց նախահաշվային գինը թերագնահատված է, քանի որ նախատեսվող սարքավորումն այդ գնով հնարավոր չէ ձեռք բերել :