Ֆիլիպիններում ծովն ափ է նետել կոկաինով փաթեթներ

Անցած կիրակի պլաստիկե ամուր փաթեթներով նյութեր են հայտնաբերել Ֆիլիպինների Կեսոն նահանգի լողափին։ Այս մասին տեղեկացրել է BBC հեռուստաալիքը՝ մեջբերելով ոստիկանության ներկայացուցիչների, ինչպես նաեւ ականատեսների խոսքերը, տեղեկացնում է ՏԱՍՍ-ը։

Փաթեթները վերջին ամիսներին սովորական բան են դարձել տեղի բնակիչների եւ ձկնորսների համար, որոնք ապրում եւ աշխատում են Ֆիլիպինների արեւելյան ափերին։

Կեսոնի ոստիկանապետ Ռամիլ Մոնտիլյայի խոսքով՝ նյութերի քիմիական վերլուծությունը դեռ չի ավարտվել։ Սակայն, ինչպես կարծում է ոստիկանը, եթե հաստատվի, որ գտնված յոթ փաթեթներում իսկապես կոկաին է, ապա դրանց արժեքը կկազմի գրեթե 700 հազար դոլար։

Ֆիլիպինների իրավապահ մարմինների տվյալներով՝ փետրվարին միայն մեկ շաբաթում արեւելյան ափ են նետվել 1 մլն դոլար արժողությամբ կոկաինի փաթեթներ։ Մայիսին ձկնորսները որսացել են 39 փաթեթ, որոնց ընդհանուր արժեքը կազմում է մոտ 4 մլն դոլար։ Հաշվի առնելով նոր գտածոների մասին կանոնավոր տեղեկությունները՝ ֆիլիպինյան նահանգներից մեկի իշխանություններն առաջարկել են բնակիչներին մեկ պարկ բրինձ (որի գինը երկրում չի գերազանցում 1 դոլարը) ոստիկանություն հանձնված յուրաքանչյուր նման փաթեթի համար։

Երկրի ազգային ոստիկանության ղեկավար Օսկար Ալբայալդեի կարծիքով՝ կոկաինի փաթեթների հայտնվելու ամենահավանական վարկածն այն է, որ թմրավաճառները ձգտում են ազատվել անլեգալ բեռից, երբ թմրանյութերի դեմ պայքարի հատուկ ջոկատները հայտնվում են նրանց կողքին։ Իրենց բեռը նրանք նետում են ծովը, իսկ որոշ ժամանակ անց փաթեթները ջրի երես են դուրս գալիս արեւելյան լողափերին եւ ձկնորսական գյուղակների կողքին։ Ամենայն հավանականությամբ, ավելացրել է Ալբայալդեն, ոստիկանության կողմից հայտնաբերվելու ժամանակ կոկաինով փաթեթները ծովն են նետում մաքսանենգները, որոնք փորձում են ծովով Ավստրալիա հասցնել անլեգալ բեռը։