Մանվել Գրիգորյանի առողջական վիճակը վատ է. նրան դատարան չէին բերել
ԵԿՄ վարչության նախկին նախագահ, գեներալ Մանվել Գրիգորյանն այսօր՝ հուլիսի 9–ին չէր ներկայացել Երեւանի ընդհանուր իրավասության դատարանի Կենտրոնի նստավայր, որտեղ պետք է կայանար իր եւ կնոջ՝ Նազիկ Ամիրյանի վերաբերյալ գործով հերթական դատական նիստը։ Նախագահող դատավոր Մնացական Մարտիրոսյանը տեղեկացրեց, որ դատարանը գրություն է ստացել «Նաիրի» ԲԿ–ից, համաձայն որի՝ Մանվել Գրիգորյանն իր առողջական վիճակից ելնելով չի կարող մասնակցել դատական նիստին։
«Անձի վիճակը այնպես պետք է լինի, որ նա կարողանա գալ եւ մասնակցել դատական նիստին»,–նկատեց Գրիգորյանի պաշտպան Լեւոն Բաղդասարյանը։
Նշենք որ նախորդ դատական նիստում Մնացական Մարտիրոսյանը բավարարել էր Մանվել Գրիգորյանի հարցով միջգերատեսչական դատաբժշկական փորձաքննություն նշանակելու վերաբերյալ միջնորդությունը՝ կատարումը հանձնարարելով Առողջապահության նախարարության համապատասխան մարմնին։
Հիշեցնենք, որ հունիսի 6–ին Մանվել Գրիգորյանը ծայրահեղ ծանր վիճակով «Դատապարտյալների հիվանդանոց» ՔԿՀ–ից տեղափոխվել էր «Սուրբ Գրիգոր Լուսավորիչ» ԲԿ, իսկ օրեր անց՝ «Նաիրի» ԲԿ։
Համաձայն մեղադրական եզրակացության՝ Մանվել Գրիգորյանը ապօրինի կերպով՝ «Զենքի մասին» ՀՀ օրենքով նախատեսված սահմանափակումների շրջանցմամբ, կնոջ՝ Նազիկ Ամիրյանի, որդու՝ Արման Գրիգորյանի եւ քննությամբ չպարզված այլ անձանց հետ նախնական համաձայնությամբ, ապօրինի կերպով ձեռք են բերել, փոխադրել եւ իրենց պատկանող երեք տներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր, ինչպես նաեւ կատարել է տարբեր տեսակի հափշտակություններ։
Նա մեղադրվում է 2016թ.-ի ապրիլյան քառօրյա պատերազմի եւ դրան հաջորդած օրերին Արցախի Հանրապետության սահմանների պաշտպանությունն իրականացնող զինվորականների եւ կամավորների կարիքները հոգալու նպատակով հատկացված գույքը յուրացնելու մեջ։