2019-ի առաջին կիսամյակում հարկային եկամուտները գերակատարվել են 63 մլրդ դրամով. ՊԵԿ նախագահ
2019 թվականի առաջին կիսամյակում հարկային փաստացի եկամուտները կազմել են 713,4 մլրդ դրամ, այսինքն ունենք շուրջ 63 մլրդ դրամի կամ 9,6 տոկոսի գերակատարում: Այս մասին, այսօր՝ հուլիսի 9-ին, լրագրողների հետ հանդիպման ժամանակ նշեց ՊԵԿ նախագահ Դավիթ Անանյանը՝ հավելելով, որ սա 24,7 տոկոսով ավելի է նախորդ տարվա ցուցանիշից:
Նրա խոսքով, հարկային եկամուտների առումով ամենաբարենպաստը երկրորդ եռամսյակն է (ապրիլ, մայիս եւ հունիս), սակայն 2019 թվականի հարկային եկամուտները պլանավորելիս որոշ գործոններ հաշվի չեն առնվել:
Մասնավորապես, այս տարվա առաջին եռամսյակում պլանավորվել է 235 մլրդ դրամ, երկրորդ եռամսյակում՝ 365,5 մլրդ դրամ, երրորդում՝ 373,7 մլրդ դրամ եւ 4-րդում՝ 382,6 մլրդ դրամ:
«Չպետք է պլանավորվելիս 3-րդ եռամսյակում ավելի շատ եկամուտ պլանավորվեր, քան երկրորդում: Մեր կարծիքով, երկրորդ եռամսյակը պետք է մոտ 40 մլրդ դրամով ավելի լիներ 3-րդ եռամսյակի ցուցանիշից: Այսինքն մոտ 405 մլրդ դրամ պետք է պլանավորվեր երկրորդ եռամսյակում եւ 330 մլրդ դրամ՝ 3-րդ եռամսյակի համար:
Այսինքն չի նշանակում, որ առաջին եռամսյակում 63 մլրդ դրամի գերակատրման միտումը հաջորդ կիսամյակում պետք է պահենք: Եթե ճիշտ պլանավորում արված լիներ, այդ դեպքում առաջին կիսամյակում գերակատարումը կլիներ 23 մլրդ, երկրորդ եռամսյակում՝ 40 մլրդ դրամ, 3-րդ եռամսյակում՝ 15 մլրդ գերակատարում եւ 4-րդ եռամսյակում՝ 25 մլրդ դրամ: Տարեկան կտրվածքով կապահովեինք 63 մլրդ դրամի գերակատարում»,-ասաց Դավիթ Անանյանը:
Նա հավելեց, որ իրենց համար ոչ այնքան հետաքրքիր է, թե որքան գերավճար կունենանք, 63 մլրդ դրամ, թե 163 մլրդ դրամ, այլ այն, թե ինչպես են ծախսվելու այդ գումարները. «Այսինքն ինչ ծախսեր եւ ինչ արագությամբ ծախսեր պետք է անենք, որ տնտեսությունից հավելյալ հարկեր գանձելու հնարավորություն ունենանք»,-ասաց նա՝ նկատելով, որ կառավարության վերջին նիստում հենց այդ 63 մլրդ դրամի գերավճարների արդյունքում 25 մլրդ դրամի հաշվին որոշումներ ընդունվեցին: