Չինաստանում յոթ ընկերուհի կես միլիոնից ավելի են հավաքել եւ գնել շքեղ առանձնատուն՝ ծերությունն անցկացնելու համար

Յոթ չինացի կանայք ստացել են «ոսկի աղջիկներ» անվանումն այն բանից հետո, երբ հավաքել են խոշոր գումար և գնել շքեղ առանձնատուն, որտեղ մտադիր են տեղափոխվել թոշակի անցնելուց հետո, տեղեկացնում է Fox News-ը։

«Սկզբում դա պարզապես կատակ էր։ Մենք ասացինք, որ միասին կապրենք, երբ լրանա մեր 60-ը, և միասին կանցկացնենք մեր ծերությունը»,- ասում են կանայք տեսահոլովակում, որը հրապարակվել է Youtube-ում։

Կատակը՝ կատակ, բայց 11 տարի անց նրանք իրականացրել են իրենց երազանքը։ Տիկնայք հավաքել են 584 հազար դոլար, գնել և լիովին նորոգել են հիասքանչ առանձնատուն։

Եռահարկ տունը շրջապատված է բրնձի դաշտերով։ Կանանցից յուրաքանչյուրի համար տանն առանձին ննջարան կա։ Բացի այդ, տունն ունի հսկայական տատամի, թեյի սենյակ, կահույք՝ բերված Հնդկաստանից և Մարոկոյից և, իհարկե, երկար սեղան հյուրասենյակում համատեղ ճաշկերույթների համար։

«Մենք իրար ճանաչում ենք ավելի քան 20 տարի։ Մենք եղել ենք գործընկերներ, իսկ երբեմն ավելի մոտ ենք եղել, քան քույրերը»,- ասում է տեսանյութի հեղինակը։