Jaguar Land Rover-ը կսկսի էլեկտրամոբիլներ արտադրել
Բրիտանական Jaguar Land Rover ընկերությունը հայտարարել է նոր էլեկտրականացված ավտոմեքենաների հավաքածուի արտադրություն կազմակերպելու ծրագրերի մասին՝ Բիրմինգեմից ոչ հեռու Քասլ Բրոմվիչ քաղաքի գործարանում, հայտնում է «Մոտորը»:
Այս հայտարարությունը հերթական քայլն է 2020 թվականից սկսած իր հաճախորդներին Jaguar եւ Land Rover բոլոր նոր մոդելների էլեկտրական կամ հիբրիդային տարբերակներով ապահովելու կոնցեռնի ռազմավարության իրականացման գործում: Արտադրական հոսքագծից իջած առաջին էլեկտրաքարը կլինի նոր սերնդի Jaguar XJ ֆլագմանային սեդանը: Այսպիսով, Jaguar Land Rover-ը գործարանում կպահպանի մի քանի հազար աշխատատեղեր:
Դեռեւս այս տարվա հունվարին կոնցեռնը հաստատել էր մարտկոցների եւ էլեկտրական ուժային սարքերի արտադրության գործարկման իր պլանները՝ նոր եւ արդեն գոյություն ունեցող հզորությունների մեջ ներդրումների շարունակման հետ միասին: Մարտկոցների հավաքման նոր գործարանի գործարկումը՝ հաշվարկված 150 հազար միավոր արտադրողականությամբ, նախատեսված է 2020 թվականին:
Վուլվերհեմփթոնում շարժիչների արտադրության կենտրոնի հետ միասին, որտեղ կենտրոնացված է Jaguar Land Rover-ի էլեկտրական ուժային սարքերի գլոբալ արտադրությունը, այս գործարանները կապահովեն Jaguar-ի եւ Land Rover-ի նոր սերնդի մոդելների թողարկումը:
Այս ամիս կսկսվի նոր սարքավորման տեղակայման աշխատանքը, որն անհրաժեշտ է Modular Longitudal Architecture ճարտարապետության նոր սերնդի ավտոմեքենաների ստեղծման համար: Սա թույլ կտա ստեղծել ոչ միայն ամբողջությամբ էլեկտրական եւ հիբրիդային մոդելներ, այլեւ սովորական բենզինային եւ դիզելային: Էլեկտրաքարերի հավաքածուի ընդլայնումը հաճախորդներին մեծ ընտրությամբ կապահովի: