Արթուր Ղազինյանը ԱՄՆ սենատորին առաջարկել է նախաձեռնել 907 բանաձեւի ամբողջական վերագործարկման շուրջ քննարկումներ

«Մեկ Հայաստան» կուսակցության նախագահ Արթուր Ղազինյանը շնորհավորական ուղերձ է հղել Ամերիկայի Միացյալ Նահանգների անկախության 243-րդ տարեդարձի առթիվ։ Դրանում ասված է.

«Շնորհավորում եմ Ամերիկյան ազգին անկախության տոնի առթիվ:

Կարծում եմ, որ հուլիսի 4-ը տոն է ոչ միայն Ամերիկայի ժողովրդի, այլ նաեւ ողջ ազատ աշխարհի համար, եւ հատկապես, այն բոլոր ազգերի ու ժողովուրդների, որոնք մարտնչել են հանուն ազատության եւ անկախության` անցնելով մաքառման դժվարին եւ երկար ճանապարհ: Հայ ժողովուրդն, անտարակույս, պատկանում է այդ ժողովուրդների թվին:

Մեր պետության եւ ժողովրդի շահերից է բխում Միացյալ Նահանգների հետ կայուն եւ հետեւողական զարգացող հարաբերությունները եւ այս իմաստով, որպես «Մեկ Հայաստան» կուսակցության նախագահ, չեմ կարող սահմանափակվել միայն բարեմաղթանքներով, այլ հարկ եմ համարում կոնկրետ նախաձեռնություններով եւ գործողություններով նպաստել հայ-ամերիկյան հարաբերությունների դինամիկ զարգացմանը:

Այս առաքելության շրջանակներում օրերս նամակով պաշտոնապես դիմել եմ ԱՄՆ Սենատի Հանրապետական մեծամասնության ղեկավար, սենատոր Միտչել Մակկոնելլին` խնդրելով եւ պահանջելով նախաձեռնել ԱՄՆ Կոնգրեսի կողմից 1992թ. ընդունված «Ազատության աջակցության ակտի» 907 բանաձեւի ամբողջական վերագործարկման շուրջ քննարկումները ԱՄՆ սենատում:

Հիշեցնեմ, որ այս բանաձեւը արգելում էր ԱՄՆ գործադիր իշխանությանը «Ազատության աջակցության ակտի» շրջանակներում որեւէ աջակցություն տրամադրել Ադրբեջանին` Արցախի խաղաղ բնակչության նկատմամբ դրսեւորած ագրեսիայի եւ բռնությունների, ինչպես նաեւ Հայաստանի Հանրապետության հակաօրինական շրջափակման պատճառով: 907 բանաձեւը կարեւոր նշանակություն ունեցավ Ադրբեջանի ռազմատենչ եւ ագրեսիվ քաղաքականության զսպման եւ Արցախի ժողովրդի կողմից իր գոյության եւ իր պատմական հայրենիքում խաղաղ կենսագործունեության երաշխավորման համար:

Ադրբեջանական լոբբիստները, ներառյալ նավթային ընկերությունները, ջանք ու ռեսուրսներ չխնայեցին 907 բանաձեւը չեղարկելու համար, ինչը տվեց իր արդյունքը 2001թ. Ջորջ Բուշ Կրտսերի նախաձեռնությամբ այն շրջանցելու մասին Կոնգրեսի համապատասխան որոշմամբ: Այդ ժամանակաշրջանում ԱՄՆ նեո-պահպանողականները Ադրբեջանին դիտարկում էին որպես ահաբեկչության դեմ պայքարի շրջանակներում համար կարեւոր լոգիստիկ հանգույց, ինչը եւ առիթ դարձավ նշված բանաձեւը մասամբ կասեցնելու համար: Որպես կասեցման հիմք, ԱՄՆ նախագահի վարչակազմը ներկայացրել էր Ադրբեջանի հավաստիացումներն այն մասին, որ Արցախի ժողովրդի նկատմամբ չի կիրառի որեւէ ագրեսիվ գործողություն:

Սակայն 2016թ. ապրիլին ազատ Արցախի դեմ ուղղված ադրբեջանական լայնամասշտաբ ագրեսիան ցույց տվեց, որ այդ բոլոր հավաստիացումները կեղծ էին, ինչը պետք է համարժեք արձագանք ստանա ազատ աշխարհի առաջնորդ ԱՄՆ կառավարության կողմից:

Լիահույս եմ, որ ԱՄՆ Սենատի Հանրապետական մեծամասնության առաջնորդը կըմբռնի պահի լրջությունը, Արցախի ժողովրդի գլխին կախված գոյության վտանգ, հատկապես՝ վերջին տարիներին Ադրբեջանում սկսված սպառազինությունների մեծածավալ ձեռքբերման եւ խիստ ռազմական հռետորաբանության շրջանակներում:

Նամակի պատասխանը ստանալուն պես հանրությանը կտեղեկացնեմ դրա բովանդակության մասին»։