Մշակվում են դատավորների բարեվարքության գնահատումն իրականացնելու համար անհրաժեշտ օրենսդրական հիմքերը

ՀՀ արդարադատության նախարարությունը հայտարարություն է տարածել դատաիրավական բարեփոխումների շրջանակում իրականացվող աշխատանքների վերաբերյալ:

«Դատաիրավական բարեփոխումների շրջանակում Արդարադատության նախարարության կողմից՝ Ազգային ժողովի Պետական-իրավական հարցերի մշտական հանձնաժողովի հետ համատեղ իրականացվում են հետեւյալ աշխատանքները՝

1. Մշակվում է դատավորների բարեվարքության գնահատման կառուցակարգը.

2. Դատավորների բարեվարքության գնահատման կառուցակարգի համատեքստում հստակեցվում են Բարձրագույն դատական խորհրդի՝ որպես դատավորի բարեվարքությունը գնահատող մարմնի լիազորությունները.

3. Մշակվում են Դատավորների բարեվարքության գնահատումն իրականացնելու համար անհրաժեշտ օրենսդրական հիմքերը, մասնավորապես՝

3.1. Հստակեցվում են դատավորի նկատմամբ կարգապահական վարույթ հարուցելու հիմքերը, ընթացակարգերը, դատավորի նկատմամբ կարգապահական վարույթ հարուցելու իրավասություն ունեցող մարմինների շրջանակը

3.2. Բարեփոխվում եւ կատարելագործվում է դատավորի գույքի, եկամուտների ծախսերի շահերի հայտարարագրման ինստիտուտը.

3.3. Ավելացվում եւ ամրապնդվում են դատավորի համար նախատեսված ինստիտուցիոնալ եւ գործառութային երաշխիքները (այդ թվում՝ սոցիալական եւ ֆինանսկան).

3.4. Մշակվում են դատարանի նկատմամբ հանրային վստահության բարձրացմանն ուղղված այլ միջոցառումների իրականացման համար անհրաժեշտ օրենսդրական հիմքերը:

Վերոնշյալ նախագծերը մշակվում են ԵԽ միջազգային փորձագետների հետ համատեղ՝ աշխատանքային քննարկումների շրջանակում, որոնց նախատեսվում է ներգրավել նաեւ քաղաքացիական հասարակության կազմակերպությունների ներկայացուցիչների:

Նախագծերը, պատրաստ լինելուց հետո, կներկայացվեն հանրային քննարկման՝ այդ թվում՝ www.e-draft.am հարթակում տեղադրելու, դատական իշխանության ներկայացուցիչների, հասարակական կազմակերպությունների, շահագրգիռ այլ գերատեսչությունների հետ քննարկումների ձեւաչափով:

Քննարկումներն ավարտելուց հետո միայն Նախագծերը կներկայացվեն Հայաստանի Հանրապետության Ազգային ժողով:

Արդարադատության նախարարությունը դատաիրավական բարեփոխումների շրջանակում իրականացվող աշխատանքների վերաբերյալ պարբերաբար կտեղեկացնի հանրությանը»,-ասված է հայտարարությունում: