Մեքսիկայի նախագահը հաշվետվություն է ներկայացրել ժողովրդին ընտրություններում հաղթելուց մեկ տարի հետո
Մեքսիկայի նախագահ Անդրես Մանուել Լոպես Օբրադորը երկուշաբթի Մեխիկոյի կենտրոնական Սոկալո հրապարակում, ընտրություններում հաղթանակից մեկ տարի հետո, հաշվետվություն է ներկայացրել կողմնակիցներին ու հակառակորդներին, տեղեկացնում է ՌԻԱ «Նովոստի»-ն։
«Դա ողջ ժողովրդի հաղթանակն էր, մեր երեխաների, որոնց պետք է ժառանգություն թողնենք երջանիկ երկիր։ Դա ձայն էր արդարության համար, որն աճում էր տարեցտարի, մինչեւ որ վերածվեց մեծամասնության հավաքական կամքի»,- այսպես գնահատեց ինքը՝ Լոպես Օբրադորը, իր հաղթանակը 2018-ին։
Նրա խոսքով՝ դա պարզապես իշխանափոխություն չէր։ «Նպատակն էր ընդմիշտ հաղթահարել կոռուպցիոն եւ լրտեսական ռեժիմը, որը գերիշխում էր առաջ։ Դա հսկայական մարտահրավեր էր՝ կառուցել նոր հայրենիք, ավելի արդար, բարգավաճ, դեմոկրատական, ազատ, խաղաղ, եղբայրական եւ ինքնիշխան»,- ասաց նա։
Օբրադորը նշեց, որ պետպարտքը նրա կառավարման օրոք անցած տարվա դեկտեմբերից չի ավելացել եւ չի ավելանա, իսկ գնաճը նվազել է 5,3 տոկոսից 4,3 տոկոսի, եթե համեմատենք 2018-ի նույն ժամանակամիջոցի հետ։ «Պետական ֆինանսները առողջ են, մեր կառավարության օրոք պեսոն դարձել է արժույթ, որն ավելի է ամրապնդվել դոլարի նկատմամբ։ Հունվարից մարտ ստացվել է ավելի քան 10 մլրդ դոլար օտարերկրյա ներդրում, ինչը 7 տոկոսով ավելի է, քան 2018-ի առաջին երեք ամիսներին»,- նշել է երկրի նախագահը։
Նա ուշադրություն է հրավիրել պետմիջոցների խնայողության ծրագրի վրա։ «Չի կարող լինել հարուստ կառավարություն աղքատ ժողովրդի պարագայում։ Կառավարությունը նրա համար չէ, որ իրեն հարուստ դարձնի, այլ որպեսզի ծառայի ժողովրդին։ Չեղյալ են համարվել 5 մլն պեսո (256 հազար դոլար) ամենամսյա թոշակները հանրապետության նախկին նախագահների համար։ Չկան նաեւ հատուկ բուժապահովագրությունները բարձրաստիճան պաշտոնյաների համար։ Միայն այս երկու միջոցները թույլ են տվել խնայել 10 մլրդ պեսո (մոտ 0,5 մլրդ դոլար)»,- ասել է Օբրադորը։
Վաճառքի համար առաջարկվել է պետպաշտոնյաների 72 ինքնաթիռ, իսկ նախագահի Boeing Dreamliner լյուքս օդանավը հանվել է մրցույթի ՄԱԿ հսկողության ներքո։ Այս եւ այլ միջոցներ թույլ կտան խնայել 4 մլրդ պեսո (205 մլրդ դոլար)։
Օբրադորը նաեւ տեղեկացրել է, որ իշխանություններին հաջողվել է 94 տոկոսով նվազեցնել վառելիքի գողությունները, ինչից խնայողությունը կկազմի 50 մլրդ պեսո (2,5 մլրդ դոլար)։
Բացի այդ, էլիտար ստորաբաժանումների 8 հազար աշխատակիցներ, որոնք մինչեւ այժմ պահպանում էին նախագահին գլխավոր շտաբում, աշխատանքի են անցել պաշտպանության նախարարությունում ու Ազգային գվարդիայում, որպեսզի «պաշտպանեն ժողովրդին»։ «CISEN հետախուզության ծառայությունը դադարեցրել է գոյությունը, եւ այլեւս ոչ ոք չի լրտեսում մեր կառավարության ընդդիմությանը»,- ընդգծել է Լոպես Օբրադորը։ Միեւնույն ժամանակ, CISEN-ի փոխարեն անցած տարվա դեկտեմբերի 1-ից ստեղծվել է մեկ այլ հատուկ ծառայություն՝ Հետախուզության ազգային կենտրոնը (CNI)։
Նախագահը նաեւ տեղեկացրել է, որ հաջողվել է կրճատել նավթի արդյունահանման անկումը երկրում 22 նավթադաշտերում։ Ընդ որում՝ ընթացիկ տարում նավթի, գազի եւ էլեկտրականության արտադրության ոլորտներում ներդրվելու է 330 մլրդ պեսո (17 մլրդ դոլար), ինչը 50 տոկոսով ավելի է, քան 2018-ին։