Իմ սնունդն ու էլսարքերը ինչո՞ւ պետք է փչանան. «Հաղթանակ» թաղամասի բնակիչները բողոքում են հոսանքի տատանումներից, ի դեպ խնդիրն առկա է տաս տարուց ավելի
Երևանի Մալաթիա-Սեբաստիա վարչական շրջանի Հաղթանակ թաղամասի բնակիչներն այսօր՝ հունիսի 26-ին, բողոքում էին իրենց տրամադրվող էլեկտրաէներգիայի պարբերաբար անջատումներից: News.am-ի թղթակցի հետ զրույցում, նրանք պատմել են, որ գրեթե ամեն օր մի քանի ժամով հոսանքազրկվում են իրենց տները:
Բնակիչներից Մելանյա Զաքինյանի խոսքով՝ խնդիրը տասը տարուց ավելի է ինչ կա, բայց վերջին շրջանում անջատումներն ավելի հաճախ են լինում:
«Հոսանքի անջատումով ինձ նեղություն են տալիս: Իմ սնունդը ինչո՞ւ պետք է փչանա իրենց պատճառով, իմ էլեկտրական սարքերն ինչո՞ւ պետք է փչանան: Ամեն օր, ամեն ժամի անջատում են անում: Առավոտ զարթնում եմ, որ գործի գնամ, նայում եմ հոսանք չունեմ, ինչի՞ համար: Ես տեղյակ եմ իրենց կեղտոտ աշխատելաձևից՝ հասարակ աշխատողից բռնած մինչև ամենաբարձր աշխատողը», - ասաց բնակչուհին։
Բնակիչներից Զորիկ Սուքիասյանի խոսքով՝ 2 տարի է ինչ դիմել են ՀԷՑ և համապատասխան նախարարարություն, բայց ոչ մի արձագնք չկա:
«Ինժիներներն եկել մեզ հետ խոսել են, բա հեսա ամեն ինչ կանենք: Ասել եմ, եթե ֆինանսի հարց կա բնակիչներով հավաքենք, օգնենք, ասացին չէ, ամեն ինչ լավ է։ Երկրորդ տարին է ոչ մի բան չեն անում, դիմել ենք նախարարություն. քամու ժամանակ անջատվում է, արևի ժամանկ անջատվում է, ամեն մի բանից անջատվում է: Արդեն քանի տարի է դիմում ենք, գալիս խաբում գնում են, սենց ապրել կլինի՞»,- ասաց բնակիչը:
Այնուհետև նրանք գնացին Կառավարարության 3-րդ մասնաշենք պարզելու, թե երբ կկարգավորվի այս խնդիրը: Բնակիչներից Վազգեն Ղուկասյանի խոսքով՝ կառավարություն են եկել, որպեսզի իրենց բողոքը հայտնեն, քանի որ այլևս չեն հանդուրժելու նման անջատումները:
Խավարի մեջ ուղղակի չգիտենք ինչ անենք: Տեսնենք, եթե իրենք էլ չեն կարող մի փոքր մասնաճյուղի հարցերը լուծել երևի ճանապարհը փակենք կամ էլ գնանք վարչապետի մոտ»,- ասաց բնակիչներից մեկը:
Նրանց հետ հանդիպեց էներգետիկ ենթակառուցվածքների և բնական պաշարների փոխնախարար Հակոբ Վարդանյանը, վերջինս բնակիչներին խոստացավ ուսումնասիրել խնդիրը և ուրբաթ օրը հանդիպել նրանց հետ,միասին քննարկել և խնդրին լուծում տալ: