«Երևանտրանս»-ը և «Ձևավորում»-ը ազատվեցին Երևանի բյուջե շահաբաժիններ չվճարելու համար տոկոսների վճարումից
Երևանի ավագանին իր այսօրվա՝ հունիսի 26-ի նիստում որոշեց «Երևանտրանս» և «Ձևավորում» ընկերություններին ազատել 2017-ի տնտեսական գործունեության արդյունքներով զուտ շահույթից հաշվարկված շահութաբաժինների վճարումը Երևանի բյուջե սահմանված ժամկետում չկատարելու համար տոկոսների հաշվարկումից ու վճարումից:
Հարցը ներկայացրեց փոխքաղաքապետ Հայկ Սարգսյանը՝ նշելով, որ այս ընկերությունների 2017-ի տարեկան գործունեության արդյունքներով առաջացած 24 մլն դրամ և 4,3 մլն դրամ զուտ շահույթներից 2018 թվականին Երևանի բյուջե պետք է վճարեին համապատասխանաբար 9,6 մլն դրամ և 1,7 մլն դրամ շահութաբաժիններ, սակայն փաստացի վճարում չի իրականացվել:
Ընկերությունների կողմից շահութաբաժինների գումարների սահմանված ժամկետներում չվճարելը պայմանավորված է Ընկերությունների ֆինանսական ցուցանիշներով, մասնավորապես ազատ դրամական միջոցների խիստ անբավարարությամբ:
«Երևանտրանս» ՓԲԸ-ի ընթացիկ ֆինանսական միջոցների անբավարարությունը հիմնականում պայմանավորված է դեբիտորական պարտքերի հավաքագրման հանգամանքով, որոնք կազմել են 544.7 մլն. դրամ:
Դրամական միջոցների ազատ մնացորդը կազմել է ընդամենը 61.3 հազ. դրամ, իսկ կրեդիտորական պարտավորությունները՝ 93.8 մլն. դրամ:
Դեբիտորական պարտքերի հավաքագրման մեծ մասի գծով ընթանում են դատական գործընթացներ կամ պարտապանները ընդգրկված են դատարանի վճիռներով լուծարման և սնանկության գործընթացներում:
«Ձևավորում» ՓԲԸ-ի դեպքում ֆինանսական ցուցանիշների վատթարացումը պայմանավորված է նրանով, որ 2018 թվականին ընկերությունը փաստացի մասնակցել է 21 մրցույթների, որոնցից հաղթող է ճանաչվել և կնքել պայմնագրեր միայն 4-ի դեպքում, արդյունքում էլ նախատեսված 98.5 մլն. դրամի դիմաց եկամուտ է ստացել 41.0 մլն. դրամի, կամ 2 անգամ պակաս:
Ներկայումս դրամական միջոցների անբավարարության հետևանքով Ընկերությունները հնարավորություն չունեն վճարել շահութաբաժնի գծով պարտավորությունը, և Երևանի ավագանու 2010 թվականի մարտի 18-ի հ.69-Ա որոշմամբ հաստատված «Երևան համայնքի սեփականություն համարվող 50 տոկոսից ավելի բաժնեմաս ունեցող կազմակերպությունների կողմից Երևանի բյուջե վճարման ենթակա շահութաբաժինները սահմանված ժամկետում չվճարելու դեպքում տոկոսների հաշվարկման, վճարման և պարտավորությունների գանձման» կարգի դրույթների համաձայն՝ սահմանված ժամկետում շահութաբաժինների չվճարելու արդյունքում հաշվարկվում են տոկոսներ ուշացրած օրերի համար՝ այսպես 20.05.2019թ. դրությամբ հաշվարկված տոկոսները կազմում են «Երևանտրանս» ՓԲԸ-ի համար շուրջ 735.0 հազ. դրամ, իսկ «Ձևավորում» ՓԲԸ-ի համար՝ 132.0 հազ. դրամ:
Հաշվի առնելով այն հանգամանքը, որ հայտնի չէ ինչ ժամանակահատվածում հնարավոր կլինի Ընկերությունների կողմից մարել շահութաբաժինների գծով պարտավորությունները, Ընկերություններին առողջացնելու նպատակով, առաջնորդվելով Երևանի ավագանու 2010 թվականի մարտի 18-ի հ.69-Ա որոշմամբ հաստատված «Երևան համայնքի սեփականություն համարվող 50 տոկոսից ավելի բաժնեմաս ունեցող կազմակերպությունների կողմից Երևանի բյուջե վճարման ենթակա շահութաբաժինները սահմանված ժամկետում չվճարելու դեպքում տոկոսների հաշվարկման, վճարման և պարտավորությունների գանձման» կարգի 5-րդ կետով, առաջարկվում է հետագայում չհաշվարկել տոկոսներ և ազատել Ընկերություններին մինչ այժմ հաշվարկած տոկոսների վճարումից:
Հայկ Սարգսյանը նշեց, որ այս պարտքերի մեծ մասը տրանսպորտի գծատերերի կողմից վճարումներ չիրականացնելն է, որոնք դա բացատրում են վնասով աշխատելով: Մի մասով արդեն դիմել են դատարան:
Նա հավելեց, որ այս վիճակը վատ կառավարման հետևանք է, դրա համար նոր քաղաքապետի առաջին քայլերից մեկը այդ ընկերությունների ղեկավար կազմի փոփոխությունն է եղել: