Մասիսի քաղաքապետի և ևս յոթ անձի վերաբերյալ գործը դատարանում է

Երևան քաղաքի դատախազությունը վերջապես դատարան է ուղարկել Մասիսի քաղաքապետ Դավիթ Համբարձումյանի և ևս 7 քաղաքացու վերաբերյալ քրեական գործը։ 

Նշենք, որ դատախազությունը երկու անգամ չէր հաստատել քրեական գործով մեղադրական եզրակացությունը և այն ուղարկել էր քննիչին։

Գործը դատարան է ստացվել հունիսի 14–ին և մակագրվել Երևան քաղաքի դատարանի դատավոր Մարինե Մելքոնյանին։

Համաձայն մեղադրական եզրակացության՝ Դավիթ Համբարձումյանը 2018թ․ ապրիլի 22-ին Արարատի մարզի Հայանիստ-Հովտաշատ գյուղերի խաչմերուկի բանուկ հատվածում մի խումբ անձանց հետ դիտավորությամբ կոպիտ կերպով խախտել է հասարակական կարգը, որն արտահայտվել է հասարակության նկատմամբ բացահայտ անհարգալից վերաբերմունք։ Հասարակական կարգի խախտումը զուգորդվել է նույն օրը՝ ժամը 19։00-ի սահմաններում, Հանրապետության հրապարակում կայանալիք հանրահավաքին մասնակցելու նպատակով դեպի նշված հրապարակ երթ կազմակերպած մասնակիցների նկատմամբ նախապես իրենց հետ վերցված զենքի և որպես զենք հանդիսացող առարկաների գործադրմամբ բռնություն գործադրելով և գույքը ոչնչացնելով։

Գոռ Համբարձումյանին և Հարություն Հակոբյանին մեղադրանք է առաջադրվել այն բանի համար, որ նա 2018թ․ ապրիլի 16-ին հասարակական կարգը խախտելու դիտավորությամբ խմբի կազմում բացահայտ անհայգալից վերաբերմունք դրսևորելով , սեփական անձը վեր դասելով հասարակության մեջ առանց պատճառի 5 րոպե տևողությամբ հայհոյանքներ է հնչեցրել Հերացի և Կորյուն խաչմերուկները փակած ցուցարարների հասցեին, որի ընթացքում բռնություն գործադրելով՝ ձեռքերով և ոտքերով հարվածներ է հասցրել նրանց։

Արմեն Մամուլյանին մեղադրանք է առաջադրվել այն բանի համար, որ նա Էրեբունի և Նոր Արեշ 26 փողոցների հատման վայրում Գոռ Խաչատրյանի, Կարեն Օհանյանի, Արմենակ Հակոբյանի եւ քննությամբ դեռևս չպարզված մի խումբ անձանց հետ մասնակցել է անհայտ անձի կողմից կազմակերպված զանգվածային անկարգություններին, որոնք ուղորդվել են բռնությամբ և ջարդերով և գույքի ոչնչացմամբ։

Մարատ Պողոսյանն էլ մեղադրվում է այն բանի համար, որ նա խախտելով հասարակական կարգը խմբի կազմում, ինքնությունները չպարզված անձանց հետ Նորագավիթ թաղամասի վերջնամասում գտնվող ՀՀ ոստիկանության ճանապարհային ոստիկանության հենակետի մոտ խուլիգանական մղումներով ոտքերով և ձեռքերով հարվածներ են հասցրել Սարգիս Սարգսյանի կողմից վարվող «Մազդա» մակնիշի անտոմեքենային՝ Ս․ Սարգսյանին պատճառելով 150,000 ՀՀ դրամ գումարի գույքային վնաս։

Ներկայացված բոլոր դրվագներն էլ առնչվում են ՀՀ վարչապետ, այն ժամանակ ընդդիմադիր գործիչ Նիկոլ Փաշինյանի առաջնորդած բողոքի ակցիաներին։

Մեղադրյալներից որևէ մեկը կալանքի տակ չէ։

Գոռ և Դավիթ Համբարձումյանների, Գոռ Խաչատրյանի և Արմենակ Հակոբյանի նկատմամբ, որպես խափանման միջող է ընտրվել գրավը, իսկ Հարություն Հակոբյանի, Արմեն Մամուլյանի, Կարեն Օհանյանի և Մարատ Պողոսյանի նկատմամբ՝ չհեռանալու մասին ստորագրությունը։