Ալափարսցիները բացել են ճանապարհը. բողոքից հետո ջրի մակարդակը ջրատարում բարձրացել է
Կոտայքի մարզի Ալափարս համայնքի բնակիչները, որոնք բողոքում էին ոռոգման ջրի բացակայությունից, և երեկ փակել էին դեպի Աղվերան տանող ճանապարհը, երեկ երեկոյան բացել են ճանապարհը։ Այս մասին News.am-ի հետ զրույցում ասաց Ալափարսի համայնքապետ Արտակ Սարիբեկյանը։
«Երեկ երեկոյան ճանապարհը բացել են, խնդրին լուծում է տրվել, որոշակի հարցեր էլ կան, Կոտայքի մարզպետի տեղակալ Վասակ Վարդանյանը խոստացել է աշնանը հարցին լուծում տալ, որ կառավարությունից թույլտվություն վերցնենք, ջրատարի խողովակին միանանք»,– նշեց նա։
Հարցին, թե ինչով է պայմանավորված ջրի սակավությունը, համայնքապետը պարզաբանեց. «Գյուղը սնվում է երեք կետից, երկուսը՝ ինքնահոս, մեկը՝ սինֆոնային համակարգով։ Երկու ինքնահոս համակարգով աշխատող ջրատարներից ջուր գալիս էր, բայց շատ քիչ, իսկ սինֆոնային համակարգը չէր աշխատում»։
Արտակ Սարիբեկյանը հավելեց, որ Սևանից են ջուր բաց թողել, և ջրատարում ջրի մակարդակը բարձրացել է. «Գյուղը երեկ օրվա երկրորդ կեսին որոշակիորեն սկսվել է ջրվել, ասում են՝ Սևանից են բաց թողել ջուրը, մենք տեսնում ենք, որ ջրատարում ջրի մակարդակը 1 մետրով բարձրացել է»։
Հիշեցնենք, որ ոբողքի ցույցի դուրս եկած ալափարսցիները պնդում էին, որ ոռոգման ջրի բացակայության պատճառով չորացել են տնկիները։