Ինչու է ՀՀ նախագահ Արմեն Սարգսյանը 2 անգամ ՍԴ դատավորի թեկնածու ներկայացրել Վահե Գրիգորյանին. պարզաբանում է Էմիլ Տարասյանը
Այս երկրում շատ չկան անհատ իրավաբաններ, որոնք ըստ Հանրապետության նախագահի՝ կարող են հավակնել այդ պաշտոնին, և հետևաբար, մենք 1 տարի հավաքագրել ենք թեկնածուներ, և այդ եղած շրջանակից, ներկայացվել է Վահե Գրիգորյանը: Այս մասին այսօր՝ հունիսի 10-ին, լրագրողների հետ զրույցում ասաց ՀՀ նախագահի աշխատակազմի ղեկավար Էմիլ Տարասյանը՝ պատասխանելով հարցին՝ ինչու է ՀՀ նախագահ Արմեն Սարգսյանը 2 անգամ ՍԴ դատավորի թեկնածու ներկայացրել Վահե Գրիգորյանին: Տարասյանի խոսքով՝ նախագահը ներկայացրել է հետգրություն, որի մեջ մանրամասն ներկայացված է, թե ինչու է առաջադրել Վահե Գրիգորյանի թեկնածությունը:
«Մեկ տարի է, որ հանրապետության նախագահը գտնվում է այդ գործընթացի մեջ, ներկայացնում է թեկնածու: 4 թեկնածու ներկայացվել է, և չեն ընտրվել: Հայտարարությունում հստակ նշված էր, որ այդ գործընթացը չէր կարող անվերջ տևել»,- ասաց նա և ավելացրեց, որ անընդհատ թեկնածու առաջադրելն ու չընտրելն արդեն խնդիր է:
Լրագրողի կարծիքին՝ նախագահի հետգրությունն իր մեջ քաղաքական նկատառում է պարունակում, Տարասյանն ասաց, որ դա լրագրողի դիրքորոշումն է, և, որ ինքը ոչինչ չի կարող ասել:
Տարասյանը նշեց, որ այստեղ խնդիրը քաղաքական շահարկումներից զերծ մնալն է, և ՀՀ նախագահը թեկնածուներ առաջադրելիս առաջնորդվել է միայն համապետական ու համազգային շահերով, և գնահատում է մարդու մասնագիտական որակը:
Այն կարծիքին, որ սահմանադրագետները խնդիր են տեսնում նույն թեկնածուի 2 անգամ առաջադրելու մեջ, Տարասյանն ասաց, որ նախագահը առաջադրողն է, ընտրողը չէ, և, որ դա արվում է Սահմանադրական դատարանի օրենքի համաձայն:
Նշենք, որ ՀՀ նախագահ Արմեն Սարգսյանը ՍԴ դատավորի թեկնածու է առաջարկել Վահե Գրիգորյանին: Դրանից առաջ ՀՀ նախագահը մի քանի թեկնածուների էր ներկայացրել, սակայն նրանք ԱԺ-ում բավարար թվով կողմ ձայներ չէին ստացել: Նշենք, որ Վահե Գրիգորյանի թեկնածությունը Արմեն Սարգսյանը ներկայացրել էր նաև նախորդ տարի, սակայն նախորդ ԱԺ-ում նրա թեկնածությունը չէր անցել:
Մի շարք իրավաբանների խոսքով՝ 2 անգամ նույն անձի թեկնածությունը ներկայացնելը իրավական խնդիր է առաջացնում․ ՀՀ «Սահմանադրական դատարանի մասին» սահմանադրական օրենքի համաձայն, այն, որ նախկինում ներկայացված և չընտրված Սահմանդրական դատարանի դատավորի թեկնածուն չի կարող կրկին ներկայացվել։
Հիշեցնենք, որ Վահե Գրիգորյանը Արմեն Սարգսյանի՝ նախագահ նշանակվելու ժամանակ ֆեյսբուքյան իր էջում, մասնավորապես, գրել էր.
«Մեզ Ազգային ժողովի ամբիոնից հենց այս պահին քաղաքացի լինելու հարցում մեր թերացումները մատնանշող, Իտալիայի մասին հենց հիմա հեքիաթներ պատմող, տխմարագույն մի ճառ արտաբերող անգերազանցելի սույն դեմագոգը մեզ այդպես չի լուսավորի, թե այդ երբ է իր՝ բրիտանական քաղաքացիությունից հրաժարվելու մասին հայտարարությունը պետական գրանցում ստացել Միացյալ Թագավորության պետական քարտուղարի կողմից»: