Քրեական հեղինակություն Արտյոմ Կանեւսկոյը դատարանում էր. նրա նկատմամբ խափանման միջոց է ընտրված

Երեւանի ընդհանուր իրավասության դատարանի Կենտրոնի նստավայրում այսօր՝ հունիսի 7–ին մեկնարկեց Արտյոմ Կանեւսկոյ անունով հայտնի 42–ամյա քրեական հեղինակություն Արտյոմ Հարությունյանի գործով առաջին դատական նիստը։

Հարությունյանը մեղադրվում է ապօրինի կերպով զենք-զինամթերք պահելու, կրելու համար։ Նրա նկատմամբ, որպես խափանման միջոց է ընտրված՝ չհեռանալու մասին ստորագրությունը։

Ըստ մեղադրանքի՝ Արտյոմ Հարությունյանն իր կողմից օգտագործվող «Տոյոտա» մակնիշի ռուսական համարանիշներով ավտոմեքենայում ապօրինի պահել է Մյասնիկ Մատինյանի անվամբ հաշվառված, ակոսափող հրազեն հանդիսացող «Сайга МК» տեսակի որսորդական ինքնալից կարաբին՝ իր պահեստատուփով, լիցքավորված որդորդական ակոսափող զենքերի համար նախատեսված, ռազմամթերք հանդիսացող 30 փամփուշտներով եւ 5.45 մմ տրամաչափի 20 փամփուշտով լիցքավորված փամփշտատուփ, որոնք 2019թ. հունվարի 12–ին հայտնաբերվել են ՀՀ ոստիկանության ԿՀԴՊ գլխավոր վարչության աշխատակիցների կողմիցբերման ենթարկված Արտյոմ Հարությունյանի ավտոմեքենայի զննությամբ։

Նախքան նիստի մեկնարկը լրագրողները միջնորդեցին տեսանկարահանում թույլատրել, սակայն ամբաստանյալ Արտյոմ Հարությունյանը չցանկացավ, ինչի արդյունքում դատարանը որոշեց թույլատրել տեսանկարահանումը այնպես, որ պաշտպանական կողմը կադրում չերեւա։

Հարությունյանի շահերը դատարանում ներկայացնում են փաստաբաններ Վարդուհի Էլբակյանը եւ Հովսեփ Սարգսյանը։

Այսօրվա նիստին դատավոր Մնացական Մարտիրոսյանը ճշտեց Կանեւսկոյի անձնական տվյալները։

Հարությունյանը հայտնեց, որ ինքը Հայաստանի եւ Ռուսաստանի քաղաքացի է, ունի երեք անչափահաս երեխա , նախկինում դատված չի եղել, առողջ է, տիրապետում է հայերեն բանավոր լեզվին, իսկ գրավոր լեզվին չի տիրապետում։

Դատավորը պարզեց, որ ամբաստանյալին մեղադրական եզրակացությունը տրամադրվել է հայերենով, ինչի պայմաններում դատարանը որոշեց հետաձգել դատական նիստը եւ եզրակացության ռուսերեն թարգմանությունը տրամադրել նրան։

NEWS.am–ի հետ զրույցում Հարությունյանի պաշտպան Վարդուհի Էլբակյանը նշեց, որ իր պաշտպանյալի մեքենայից զենքը հայտնաբերել են նրան բերման ենթարկելուց հետ։

«Արտյոմ Հարությունյանն օրինական զենք ունի, որի վերաբերյալ փաստաթղթերն առկա են նաեւ քրեական գործում։ Իսկ այն զենքը, որը հայտնաբերվել է նրա մեքենայից, Հարությունյանին չի պատկանել, այլ հաշվառված է եղել Մյասնիկ Մատինյանի անունով։ Վերջինս ցուցմունք է տվել եւ հայտնել, որ այս զենքով պատրաստվել են Հարությունյանի հետ գնալ որսի, դրա համար զենքը թողել է նրա մեքենայի բեռնախցիկում»,–ասաց նա։

Փաստաբանը պատմեց, որ հունվարի 12–ի երեկոյան ժամը 22։15–ին Հարությունյանը դուրս է եկել մարզասրահից երբ նրան բերման են ենթարկել։

Վարդուհի Էլբակյանը նշեց, որ շուրջ 4 ժամ ոստիկանության վեցերորդ վարչության աշխատակիցները թույլ չեն տվել պաշտպաններին տեսնել Հարությունյանին, ինչն ըստ նրա՝ քրեական դատավարության օրենսգրքի կոպտագույն խախտում է։

Պաշտպանների բացակայությամբ էլ կատարվել է Հարությունյանի ավտոմեքենայի զննությունը։

Հիշեցնենք, որ հունվարի 12-ին ոստիկանության կազմակերպված հանցավորության դեմ պայքարի գլխավոր վարչության ծառայողները վարչապետի հայտարարած՝ «Ասֆալտին փռելու» օպերացիայի շրջանակներում Երեւանի Հրաչյա Քոչարի եւ Վաղարշյան փողոցների խաչմերուկից գլխավոր վարչություն էին բերման ենթարկվել 42-ամյա Արտյոմ Հարությունյանին եւ նրան ուղեկցող անձանց՝ ապօրինի զենք-զինամթերք ու սառը զենք պահելու, կրելու կասկածանքով:

Ոստիկանները Երեւանում բերման են ենթարկել մի քանի տղամարդու' ապօրինի զենք պահելու կասկածանքով