Սոցցանցերում նկատվող ագրեսիան մի օր դուրս է գալիս իրականություն. Պատգամավորը՝ ակտիվիստին ծեծելու մասին
Ցանկացած արարք, որ սահմանված է ՀՀ քրեական օրենսգրքով, հանցագործություն է եւ համապատասխան հետեւանքներ պետք է առաջացնի, իսկ ծեծը քրեական օրենսգրքով սահմանված արարք է եւ հանցագործություն։ Այս մասին այսօր՝ հունիսի 5-ին, ԱԺ ավանդական ճեպազրույցի ժամանակ ասաց ՀՀ ԱԺ «Լուսավոր Հայաստան» խմբակցության պատգամավոր Տարոն Սիմոնյանը՝ խոսելով ՀԱԿ ակտիվիստ Վարդան Հարությունյանի հետ կապված ծեծի պատմության մասին։
«Մենք բազմիցս նշել ենք, որ հանրությունում այսօր ագրեսիայի աճ է նկատվում թե՛ սոցցանցերում, թե՛ նաեւ իրականությունում»,–նշեց նա՝ իր գործընկերներին եւ բոլոր քաղաքացիներին կոչ անելով զերծ մնալ բռնության ցանկացած դրսոեւորումից եւ այն խրախուսելուց։
Հարցին, թե կարծում է այդ պատմությունը կապված է սոցցանցերում ագրեսիայի աճի հետ, Տարոն Սիմոնյանը պատասխանեց. «Ես կարող եմ նշել, որ ամեն ինչ փոխկապակցված է։ Եթե սոցցանցերում թույլ ենք տալիս կամ աչք ենք փակում ահագնացող այդ ագրեսիայի վրա, դա մի օր դուրս է գալու իրականություն։ Ես չեմ բացառում, որ այն, ինչ տեղի ունեցավ երեկ կամ դրանից առաջ, նաեւ դրա արդյունք է։ Դա նաեւ արդյունքն է հանրային իշխանությունների որոշակի հայտարարությունների, որոնք մենք ասում ենք՝ ագրեսիա է պարունակում եւ պարունակել է։ Նրանք պետք է իրենց խոսքում բացառեն ագրեսիայի որեւէ դրսեւորում, հակառակը՝ հանրության դաստիարկչականա խոսք եւ գործ լինի»։
Մեկ այլ հարցին, թե ինչպես կմեկնաբանի «Մարտի 1–ի» գործով մեկ անձի ձերբակալությանը եւ վստահում են արդյոք քննչական մարմնին, պատգամավորը պատասխանեց. «Ինչպիսին, որ հանրության վերաբերմունքն է իրավապահ համակարգի նկատմամբ, մենք էլ այդ հանրության մի մասն ենք, մի մասով վստահում ենք, մյուս մասով չենք վստահում։ Ինչ վերաբերում է կոնկրետ անձի ձերբակալությանը, գիտեք՝ քրեական գործի հետաքննության, նախաքննության ընթացքում չենք կարող միջամտել գործին, դրա համար մեկնաբանության հնարավորություն էլ չունենք։ Միայն կարող ենք ասել, որ այն անձինք, որոնք իրականում նման արարք կատարել են եւ առկա է բավարար ապացուցողական բազա, որ նրանց մեղքը ինչ–որ առումով ապացուցվում է, նրանք բնականաբար պետք է ներգրավվեն գործում որպես մեղադրյալ, հետո նաեւ ամբաստանյալ»։
Երեկ Հատուկ քննչական ծառայությունը հաղորդագրություն է տարածել 2008 թվականի մարտի 1-ի դրությամբ ՀՀ ոստիկանության զորքերի հրամանատարի տեղակալ, շտաբի պետ Գեղամ Պետրոսյանի ձերբակալության մասին, ով կասկածվում է 10 զոհերից մեկի՝ Զաքար Հովհաննիսյանի սպանության համար: