ՀՀ-ում կարող էինք ունենալ կալանավորվածների եռանիշ կամ քառանիշ աճ, բայց դա կազդեր այլ ցուցանիշների վրա. Փաշինյան

Երկրորդ անգամ է, որ մեր կառավարությունը բյուջեի կատարողական է ներկայացնում: Նախորդ տարվա առաձնահատկությունն այն էր, որ մեր կառավարությունը բյուջեի կատարողականի հետ ոչ մի առնչություն չուներ, որովհետեւ խոսքը 2017 թվականի կատարողականի մասին էր; Այս մասին, այսօր՝ հունիսի 5-ին, ԱԺ-ում 2018 թբվականի պետական բյուջեի կատարողականի քննարկումների մեկնարկին իր խոսքում նշեց ՀՀ վարչապետ Նիկոլ Փաշինյանը:

Նրա խոսքով, այս տարվա առանձնահատկությունն այն է, որ կառավարությունն ունի ոչ ամբողջական մասնակցություն, որովհետեւ նոր կառավարության ղեկն ստանձնել է 2018-ի մայիսին:

«2018-ը աննախադեպ տարի էր քաղաքական առումով. 2018-ի ընթացքում տեղի են ունեցել ՀՀ նախագահի մեկ ընտրություն, ՀՀ վարչապետի 5 ընտրություն, ԱԺ արտահերթ ընտրություններ, Երեւանի քաղաքապետի մեկ ընտրություն եւ երկրում տեղի է ունեցել թավշյա հեղափոխություն: Սա կարեւոր է նկարագրելու համար այն ֆոնը, որի պայմաններում տեղի է ունեցել բյուջեի կատարման ընթացքը: Այս պայմաններում մեր կառավարությունը կարողացավ լուծել ամենակարեւոր խնդիրը՝ մակրոտնտեսական կայունության պահպանման խնդիրը:

Երեւի թե հնարավոր չէ համաշխարհային պատմության մեջ գտնել շատ դեպքեր, երբ երկրում նման մասշտաբային փոփոխությունները չեն ուղեկցվում տնտեսական ցնցումներով, ֆինանսական համակարգի փլուզումներով»,-ասաց վարչապետը:

Նա ընդգծեց, որ 2018-ին արձանագրվել է 5,2 տոկոս տնտեսական աճ, բայց 2018-ի բյուջեի նախագծում կանխատեսվել էր 4,5 տոկոս տնտեսական աճ:

«Այսինքն կառավարությանը հաջողվել է գերակատարել նախատեսված պլանը: 2018-ի պետական բյուջեով ՀՀ կառավարությունը չունի չկատարված պարտավորություններ: Մենք 2018-ին ունեցել ենք ցածր գնաճային ֆոն: Ես հիշում եմ, որ օգոստոս-սեպտեմբեր ամիսներին մամուլում հիմնական քննարկվող թեման գնաճն էր եւ շատ նեգատիվ կանխատեսումներ էին արվում, որ կունենանք գնաճային ցնցումներ, բայց մեզ հաջողվեց այդ թվում որոշ արտակարգ միջոցներով, զսպել գնաճը, իսկ տարվա կտրվածքով ունեցանք գնանկում:

Թերակատարում ունենք մի փոքր ծախսային մասերով: Այսինքն ծախսերը ոչ ամբողջությամբ է հնարավոր եղել իրականացնել, բայց սա կապ ունի մի քանի խնդիրների, այդ թվում կոռուպցիայի դեմ հայտարարված պայքարի հետ: Այսօր էլ կան խոշոր վարկային ծրագրերով իրականացվող նախագծեր, որոնց վերաբերյալ կան հարցեր, հարուցված են քրեական գործեր եւ այդ գործերի հարուցման լեյտմոտիվը այն է, որ պետական բյուջեի միջոցները պետք է ծախսվեն մաքսիմալ արդյունավետ»,-ասաց Փաշինյանը:

Նրա համոզմամբ, 2018-ին մակրոտնտեսական կայունությունը, որ հնարավոր եղավ պահպանել, երկու հիմնական պատճառ ունի. «Առաջինը, որն ուզում եմ ընդգծել, մենք պետք է գոհունակությամբ արձանագրել, որ ՀՀ-ում կան որոշակի կայացած ինստիտուտներ, որոնք հեղափոխության շրջանում իրենց դերակատարումն ունեցան: Երկրորդը՝ հեղափոխության թավշյա բնույթն է, որը բազմիցս քննադատվել է: Շատ է նշվում, որ փոփոխությունների գործընթացում թավիշը շատ է, պետք է ավելի կոշտ լինի հեղափոխությունը: Իհարկե, կարող է, բայց բանն այն է, որ կառավարությունը չի կարող իր առջեւ միայն մեկ խնդիր ունենա լուծելու: Կառավարության գործունեությունը բազմաթեւ կշեռք կամ ճոճանակ է: Եթե սովորական կշեռքներն ունեն երկու նժար, կառավարությունը կառավարում է բազմանժար կշեռքով: Եթե հավասարակշռությունը խախտվի, մենք կունենանք կոլապսներ այլ ոլորտներում:

Մենք խնդիր ենք դրել լինել խիստ բալանսավորված, չկորցնել հավասարակշռությունը որեւէ ոլորտում:

Իհարկե, ՀՀ-ում կարող էինք կալանավորվածների, դատապարտյալների թվում երկնիշ, եռանիշ կամ քառանիշ աճեր ունենալ, բայց դա անխուսափելիորեն կազդեր այլ ցուցանիշների վրա:

Այն կայունությունը, որ մենք պահպանել ենք, շատ կարեւոր է եւ այս տարվա 4 ամիսների ցուցանիշները գալիս են ապացուցելու այդ մասին: Ոչ միայն նախորդ կառավարության նպատակադրումներն ենք գերակատարել, այլ նաեւ ինքներս մեր կանխատեսումները: Ուրախ եմ արձանագրել, որ մենք առաջին եռամսյակի կտրվածքով ունենք 7,1 տոկոս ՀՆԱ աճ: Ապրիլին տնտեսական ակտիվության ցուցանիշը 9,1 տոկոս է կազմել: Սա համատեղ աշխատանքի արդյունք է»: