Բայց վստահեցնում եմ ԸՕ փոփոխություն լինելու է եւ մյուս համապետական ընտրությունները լինելու են նոր ԸՕ–ով. Ալեն Սիմոնյան

Ապրիլյան պատերազմի հարցով քննիչ հանձնաժողովի նիստերը պետք է լինեն փակ։ Այս մասին ասյօր՝ հունիսի 3-ին, լրագրողների հետ զրույցում կարծիք հայտնեց ՀՀ ԱԺ փոխնախագահ Ալեն Սիմոնյանը։

«Ապրիլյան պատերազմի հարցով քննիչ հանձնաժողովի նիստերը պետք է լինեն փակ, քանի որ հարցը վերաբերում է բանակին, անվտանգությանը, մենք չգիտենք ինչ կարող ենք լսել եւ ինչ կարող ենք իմանալ։ ես կարծում եմ, որ ամբողջությամբ փակ պետք է լինի»,–նշեց նա։

Ընդդիմադիր պատգամավորների պնդումներին, թե իրենք տեղեկություն չեն ունեցել, որ իշխանական խմբակցությունը քննիչ հանձնաժողով է պատրաստվում ստեղծել, Ալեն Սիմոնյանն ասաց. «Մենք գաղտնի որեւէ բան չենք անում, դա նախորոդ իշխանությունների գործելաոճն է։ Վստահեցնում ե, որ եթե ինչ–որ տեղ եղել է թերացում, ենթադրենք ինչ–որ բան մեկ օր առաջ պետք է ասեինք, մենք կլրացնենք այս մեկ օրը, իրենք մտահոգվելու որեւէ բան չունեն»։

Դիտարկմանը, թե նույն պնդումը ընդդիմադիրները անում են նաեւ վեթինգի դեպքում, Աժ փոխնախագահն ասաց. «Մենք ասել ենք, որ լինելու է անցումային արդարադատություն, անցումային արդարադատությունն ունի մի քանի գործիք, այդ գործիքներից է վեթինգը։ Ես չեմ բացառում, որ մի քանի ամիս հետո մենք խոսենք այլ գործիքի մասին, որ անցումային արդարադատությունն իրականանա»։

Հարցին՝ Ընտրական օրենսգիրքը երբ է միս ու արյուն ստանալու եւ երբ այն կընդունվի, քանի որ բավական աշխատանք է տարվել, նա ասաց, որ քանի որ առաջիկայում համապետական ընտրություններ չկան, ուզում են եւս մեկ անգամ կարդալ եւ հասկանալ մեջն ինչ սխալ եւ ինչ բացթողում կարող է լինել։

«Բայց վստահեցնում եմ ԸՕ փոփոխություն լինելու է եւ մյուս համապետական ընտրությունները լինելու են նոր ԸՕ–ով»,–հավելեց Ալեն Սիմոնյանը։