Արսեն Ջուլֆալակյանն իրարամերժ հայտարարություններ է արել. ՔՈ-ն դիմել է Էթիկայի հանձնաժողով
«Քաղաքացու որոշում» սոցիալ-դեմոկրատական կուսակցությունը դիմել է Բարձրաստիճան պաշտոնատար անձանց էթիկայի հանձնաժողով՝ համարելով, որ հակասություններ կան ՀՀ ԱԺ «Իմ քայլը» խմբակցության պատագամավոր Արսեն Ջուլֆալակյանի հայտարարագրում եւ նրա հայտարարություններում։
Կուսակցության գործադիր մարմնի քարտուղար Սուրեն Սահակյանը News.am-ի հետ զրույցում նշեց, որ հենց Ջուլֆալակյանն է կասկածի տեղիք տվել, երբ հայտնի ծեծի միջադեպի առնչությամբ իրարամերժ հայտարարություն է արել. «Հայտնի ծեծի միջադեպի առնչությամբ նա հայտարարել է, որ միջադեպը իր սեփականության հետ կապված քննարկումների հետեւանք էր։ Միջադեպից անցել է 23 օր, սակայն մենք մեր հարցերի պատասխանը չենք ստացել եւ դրա համար դիմել ենք Բարձրաստիճան պաշտոնատար անձանց էթիկայի հանձնաժողով»։
Սուրեն Սահակյանի խոսքով՝ նրա հայտարարագրում նշված չէ, որ բաժնեմաս ունի որեւէ սրճարանում, մինչդեռ այլ հայտարարություն է արել։
Նշենք, որ ԿԸՀ ներկայացրած պատգամավորի հայտարարագրում նաեւ նշված է, որ «Փարիզյան» սրճարանի 35 տոկոսի սեփականատերն է։
Ջուլֆալակյանը, սակայն, արձագանքելով ՔՈ-ի հայտարարությանը, նշել էր. «Այդ սրճարանն իմը չէր, ես ունեի մասնաբաժին, բայց դա տասը օր առաջ վաճառել եմ»:
Պատգամավորի այս հայտարարությանը ՔՈ–ի գործադիր մարմնի քարտուղարը արձագանքում է. «Եթե մենք վստահ լինեինք, որ հանցագործություն կա եւ դա այնքան հիմնավորված է, որքան պարոն Ծառուկյանի դեպքում, կդիմեինք իրավապահ մարմիններին, բայց այս դեպքում դիմել ենք Բարձրաստիճան պաշտոնատար անձանց էթիկայի հանձնաժողով՝ պարզելու համար, թե ինչքանով են պատգամավորի խոսքերը համապատասխանում իրականությանը եւ ինչքանով է իրականությունը արտացոլված նրա հանձնած հայտարարագրի մեջ»։
Հիշեցնենք, որ ոստիկանությունը հայտնել էր, որ մայիսի 5-ին ժամը 17:40-ին ահազանգ են ստացել «Էրեբունի» բժշկական կենտրոնից, որ շտապօգնության մեքենայով Աբովյան-Թումանյան փողոցների խաչմերուկից սալջարդերով հիվանդանոց է տեղափոխվել մի քաղաքացի։ Հիվանդանոց տեղափոխված անձը՝ Սերգեյ Միխիթարյանը հայտնել էր, որ իրեն «ձեռքերով եւ ոտքերով հարվածներ են հասցրել» Լեւոն եւ Արսեն Ջուլֆալակյանները։ Արսեն Ջուլֆալակյանն էլ ֆեյսբուքյան իր էջում գրել էր, որ ոչ մի ծեծ կամ ֆիզիկական բռնության գործադրում չի եղել. «Միանգամից ասեմ, ոչ մի ծեծկռտուք եւ ֆիզիկական բռնություն իմ եւ իհարկե Լեւոն Ջուլֆալակյանի կողմից ՉԻ եղել։ Սերգեյ Մխիթարյանը հանդիսանում է մեզ հետ միասին սրճարանի համասեփականատեր եւ երեկ հանդիպել էինք գործնական հարցերի քննարկման համար,որն անցել է սովորականից մի փոքր լարված մթնոլորտում»։