«Ֆիթչ Ռեյթինգս»-ը վերահաստատել է Երեւանի վարկանիշը՝ «Դրական» կանխատեսմամբ. քաղաքապետարան

«Ֆիթչ Ռեյթինգս» (Fitch Ratings) միջազգային վարկանշային գործակալությունը վերահաստատել է Երեւանի վարկանիշը՝ հանրային ֆինանսների բնագավառում սահմանելով այն «B+» մակարդակում «Դրական» կանխատեսմամբ:

 Երեւանի վարկունակությունը, գործակալության գնահատականով, գտնվում է «bbb-» մակարդակում (ներդրումային մակարդակի վերջին աստիճան):

Ըստ «Ֆիթչ»-ի՝ Հայաստանի խոշորագույն քաղաք Երեւանը համարվում է երկրի ամենամեծ շուկան՝ ծառայությունների ոլորտի զարգացած մակարդակով եւ ամենաշատ բնակչությամբ (1.1 մլն մարդ):

«Երեւանի բարեկեցության ցուցանիշները դեռեւս մնում են համեմատաբար ցածր մակարդակում, ինչն ազդեցություն է թողնում քաղաքի ընդհանուր ֆինանսական պատկերի վրա: Քաղաքը պահպանում է պարտք չունենալու կարգավիճակը, թեպետ հնարավորություն ունի ներգրավելու փոխառություններ ներքին կապիտալի շուկայում՝ որոշակի սահմանափակումներով հանդերձ»,- նշված է «Ֆիթչ»-ի զեկույցում:

Հարկ է նշել, որ աշխարհի առաջատար մասնագիտացած կազմակերպության կողմից հաստատված վարկանիշը միջազգային վարկային կազմակերպությունների եւ գործարարների համար կարեւոր ցուցիչ է, քանի որ ներդրումային շուկան ընտրելիս նման կառույցների հրապարակած ցուցանիշներն ու կայունության կանխատեսումները գործնականում համարվում են արժանահավատ եւ հիմնավոր։

Վերահաստատված վարկանիշի առավել մանրամասն հիմնավորումներին եւ կանխատեսումներին կարող եք ծանոթանալ «Ֆիթչ Ռեյթինգս» գործակալության պաշտոնական fitchratings.com կայքում: