Ռոբերտ Քոչարյանը իշխանության համար ամենահարմար ընդդիմությունը կլինի. Ալեն Սիմոնյան (տեսանյութ)

Մեր կողմից որեւէ լարվածություն չկա, կարծում եմ՝ ճիշտ կլինի հարցն ուղղեք այն մարդկանց, ում դուք սպասում էիք այնտեղ տեսնել, վերջիվերջո Սարդարապատի տոնը դա «Իմ քայլը» դաշինքինը, Նիկոլ Փաշինյանինը կամ իմը չէ, դա համայն հայության տոնն է։ Այս մասին այսօր՝ մայիսի 29-ին, լրագրողների հետ զրույցում ասաց ՀՀ ԱԺ փոխնախագահ Ալեն Սիմոնյանը՝ խոսելով Մայիսի 28-ին՝Հայաստանի Առաջին Հանրապետության հռչակման օրը Արցախի ղեկավարության ներկայացուցիչների հրավիրված չլինելու եւ նրանց հետ ՀՀ ղեկավարության հարաբերությունների մասին։

«Ես արարողակարգային հարցերով չեմ զբաղվում եւ չգիտեմ՝ հրավիրել են Արցախի ղեկավարությանը, թե չեն հրավիրել, բայց միեւնույն ժամանակ եթե տոնը համայն հայությանն է, պե՞տք է հրավեր լինի, եթե ինչ–որ հայ գալիս է այնտեղ, մենք պետք է ասենք՝ ինչո՞ւ ես եկել այնտեղ»,–նշեց նա։

Հարցին՝ այնուամենայնիվ եթե պարզվի հրավեր չի եղել, ինչպիսի՞ն կլինի իր վերաբերմունքը, Ալեն Սիմոնյանն ասաց. «Եկեք պարզենք հրավեր եղել է, թե չէ, ես չեմ կարծում, որ ապրիլի 24-ը, Անկախության օրը, Սարդարապատի օրը հրավերով է, այսինքն եթե չենք հրավիրում, մեզ համար այդ օրը տոն չի»։

Դիտարկմանը, որ Մայիսի 28-ին քաղաքում տոնական տրամադրություն չկար, ի տարբերություն մայիսի 9-ը. «Դուք հարց եք տալիս, որը զուտ էմոցիոնալ ոլորտում է, ես երեկ քայլել եմ փողոցներով, մարդիկ ինձ շնորհավորել են, տեսել եմ սեղանների շուրջ գինի խմող եւ տոնը նշող մարդկանց, հիմա մարդ կա՝ չի քայլել, չի զգացել այդ տոնը, կախված է մարդկանց վերաբերմունքից։ Մայիսի 9-ը եռատոն է, ոչ միայն Հայաստանի նորանկախ պատմության մեջ կարեւոր օր է, այլ նաեւ համաշխարհային պատերազմում մենք 600 հազարի հասնող զոհ ենք տվել, որը բավականին մեծ թիվ է։ Քաղաքացու օրը մի քիչ ավելի վատ նշվեց, միգուցե մյուս տարի ավելի լավը կլինի, եկեք էմոցիաների դաշտ չմտնենք»։

Խոսելով ՀՀ երկրորդ նախագահ Ռոբերտ Քոչարյանի՝ քաղաքական դաշտ մտնելու մասին հայտարարությունից՝ Ալեն Սիմոնյանն ասաց. «Այսինքն ֆիքսում ենք, որ ինքը քաղաքական պայքարի մեջ չէր եւ այսուհետ ես ազատ եմ ու դուք ազատ եք բոլոր այն մարդկանց, որոնք կպնդեն, թե Ռոբերտ Քոչարյանի նկատմամբ իրականացվել է քաղաքական հետապնդում, կարող ենք ասել, որ նա քաղաքականությամբ չի զբաղվել եւ մեղադրանքն առաջադրվել է այն ժամանակ, երբ նա քաղաքականությամբ չի զբաղվել»։

ԱԺ փոխնախագահը, սակայն, կարծում է՝ Քոչարյանը իշխանության համար հարմար ընդդիմություն կարող է լինել. «Ես համարում եմ, որ ինձ համար ամենահարմար ընդդիմությունը կարող են լինել, որովհետեւ իրենք նախկինում բավականին բացասական հետք են թողել ՀՀ–ում, եւ ինձ՝ որպես իշխանության ներկայացուցչի հեշտ լինի թե՛ քննադատել, թե՛ իրենց հետ բանավեճի մեջ մտնել։ Այնուամենայնիվ, ես կարծում եմ ընդդիմոիւթյուն կարող են լինել ուժեր, մարդիկ, որոնք անմիջական շփում ունեն ՀՀ քաղաքացիների հետ, գիտեն նրանց ցավերը, խնդիրները, իրենց պարագայում ես խիստ կասկածում եմ»։