Նյարդայնացնում է հայ ժողովրդին «էշի տեղ» դնելու իշխանությունների մանկամիտ գործելաոճը. Աշոտյան

Չեմ պատրաստվում չարախնդալ Ղազախստանի մայրաքաղաքում Հայաստանի եւ Ռուսաստանի ղեկավարների միջեւ այդպես էլ չկայացած հանդիպման առիթով: Այս մասին Facebook-ի իր էջում գրել է ՀՀԿ փոխնախագահ Արմեն Աշոտյանը՝ իր գրառումը վերնագրելով. «Պուտին-Փաշինյան չկայացած հանդիպման մասին»:

Նա, մասնավորապես, նշել է. «Վերջիվերջո, մեր ռազմավարական գործընկեր պետության հետ օրեցօր կուտակվող եւ երեւացող խնդիրները անհանգստացնում են նաեւ ինձ:

Սակայն նյարդայնացնում է հայ ժողովրդին մոլորության մեջ գցելու, կներեք՝ «էշի տեղ» դնելու, այս իշխանությունների մանկամիտ գործելաոճը:

Հիշեցնեմ իրենց, որ դեռեւս մայիսի 17-ին, ռուս լրագրողների հետ հանդիպմանը Փաշինյանը հայտարարել էր, թե մինչեւ հունիսի վերջ պատրաստվում է երկու անգամ հանդիպել ՌԴ նախագահ Վլադիմիր Պուտինի հետ, առաջին անգամ` Ղազախստանում մայիսի 29–ին կայանալիք ԵՏՄ բարձրագույն տնտեսական խորհրդի գագաթնաժողովի ժամանակ, իսկ դրանից հետո մտադիր է մեկնել Սանկտ Պետերբուրգ, որտեղ միջազգային տնտեսական համաժողով կանցկացվի, եւ հույս ունի, որ այնտեղ կրկին կհանդիպի Ռուսաստանի առաջնորդին։

Իսկ Ռուսաստանի խորհրդարանի Դաշնության խորհրդի նախագահ Վալենտինա Մատվիենկոն Սանկտ Պետերբուրգում Արարատ Միրզոյանի հետ հանդիպմանը հայտարարել է, որ մայիսի 29-ին Նորսուլթանում նախատեսված են Փաշինյան-Պուտին երկկողմ բանակցություններ։

Հա ասել եմ, էլի կրկնում եմ. տղերք, խոսելուց առաջ մշտապես հիշեք, որ «գյուղից մարդ կա»: