Ինչու չկայացավ Փաշինյան-Պուտին հանդիպումը
Շուրջ մեկ ժամ առաջ հայաստանյան որոշ լրատվամիջոցներ տեղեկություն տարածեցին այն մասին, որ Ղազախստանի մայրաքաղաքում մեկնարկած Եվրասիական բարձրագույն տնտեսական խորհրդի նիստի ավարտից հետո ՀՀ վարչապետ Նիկոլ Փաշինյանը կտրուկ որոշել է չեղարկել օրակարգում նախատեսված մյուս հանդիպումները, այդ թվում՝ հայ համայնքի գործարարների հետ, եւ վերադառնալ Երեւան:
Մասնավորապես, Factor.am-ը (որի լրագրողը այս պահին գտնվում է Նուր-Սուլթանում) նշել էր, որ վարչապետ Փաշինյանը չի մասնակցի Եվրասիական բարձրագույն տնտեսական խորհրդի նիստի ավարտից հետո սպասվելիք պատվիրակությունների ղեկավարների պաշտոնական ճաշին: «Չեղարկվել է ոչ միայն Փաշինյանի մասնակցությունը նիստից հետո տեղի ունենալիք պաշտոնական ճաշին, այլեւ Նուր-Սուլթանում Հայաստանի դեսպանատանը Ղազախստանի հայ գործարարների հետ նախանշված հանդիպումը: ԵՏՄ բարձրագույն խորհրդի նիստից հետո հայկական պատվիրակությունը մեկնելու է օդանավակայան»,-գրել էր կայքը՝ հավելելով, որ Նիկոլ Փաշինյանը չի պատասխանելու նաեւ լրագրողների հարցերին:
Նշվել է նաեւ, որ Նիկոլ Փաշինյան- Վլադիմիր Պուտին հնարավոր երկկողմ հանդիպումը եւս չի կայացել:
Ի դեպ, Sputnik-Armenia-ն իր հերթին նշել է, որ իրենց Ղազախստանի թղթակցին Ղազախստանի ԱԳՆ ներկայացուցիչ Այբեկ Սմադիարովը հայտնել է. «Փաշինյանը մեկնեց»:
Այս առնչությամբ News.am-ը պարզաբանման համար դիմել է ՀՀ վարչապետի մամուլի խոսնակ Վլադիմիր Կարապետյանին, ով հայտարարեց, որ ՀՀ վարչապետ Նիկոլ Փաշինյանի` Ղազախստան այցի օրակարգի որեւէ փոփոխություն չի եղել։
«Պաշտոնական ճաշից հետո եկել ենք Ղազախստանում ՀՀ դեսպանություն եւ հիմա հանդիպում է տեղի ունենում հայ գործարարների հետ։ Օրակարգի որեւէ փոփոխություն չի եղել։ Բոլոր միջոցառումները տեղի են ունեցել ըստ օրակարգի։ Մենք հաջողությամբ նախագահել ենք, բոլոր փաստաթղթերն ընդունվել են, բոլոր համաձայնագրերը ստորագրվել են։ Ապա նախագահող երկրի վարչապետ Նիկոլ Փաշինյանի եւ ԵՏՀ կոլեգաիայի նախագահ Տիգրան Սարգսյանի կողմից եղել է համատեղ հայտարարություն, այնուհետեւ ճաշ, եւ հիմա մենք գտնվում ենք դեսպանությունում»,–նշեց նա։
Հարցին՝ ՌԴ նախագահ Վլադիմիր Պուտինի հետ հանդիպումը կայանալո՞ւ է՝ ինչպես հայտարարել էր Ռուսաստանի խորհրդարանի վերին պալատի՝ Դաշնության խորհրդի ղեկավար Վալենտինա Մատվիենկոն, վարչապետի մամուլի քարտուղարը հավաստիացրեց, որ նման պայմանավորվածություն չի եղել. «Օրակարգով նման հանդիպում նախատեսված չի եղել։ Կրկնում եմ՝ օրակարգով բոլոր միջոցառումները տեղի են ունեցել»։
Հարցին՝ գուցե Նիկոլ Փաշինյանը վիրավորվել է, որ բացի իրենից, ԵՏՄ անդամ բլոր երկրների ղեկավարները պարգեւատրվել են Նազարբաեւի անվան շքանշանով, Վլադիմիր Կարապետյանը ասաց, որ այսպիսի խոսակցությունները «հիվանդ երեւակայության արդյունք են». «Օրակարգում որեւէ պարգեւատրման արարողություն չի եղել։ Բարձր տրամադրությամբ, շատ հաջող միջոցառումներ են տեղի ունենում: Մնացած երկկողմ շփումներն ու հանդիպումները թող մեկնաբանեն այն երկրները, որոնց այն վերաբերում է»։
Հիշեցնենք, որ դեռեւս ապրիլին Սանկտ Պետերբուրգում ՀՀ ԱԺ նախագահ Արարատ Միրզոյանի հետ հանդիպման ժամանակ Ռուսաստանի խորհրդարանի վերին պալատի՝ Դաշնության խորհրդի ղեկավար Վալենտինա Մատվիենկոն հայտնել էր, որ ՌԴ նախագահ Վլադիմիր Պուտինն ու ՀՀ վարչապետ Նիկոլ Փաշինյանը մայիսի 29-ին Ղազախստանի մայրաքաղաքում երկկողմ հանդիպում կունենան:
Բացի այդ, ավելի վաղ լրատվամիջոցները գրել էին, որ այսօր Ղազախստանում Նազարբաեւի անվան շքանշաններ են շնորհվել ՌԴ-ի, Բելառուսի եւ Ղրղզստանի նախագահներին, սակայն բացառություն է եղել ՀՀ վարչապետը։